ഓട്ടവ: ആരോഗ്യ സംബന്ധമായ ഉൽപ്പന്നങ്ങളും മറ്റ് മരുന്നുകളും ഓൺലൈനായി വാങ്ങുന്നതിൽ കനേഡിയൻമാർക്ക് മുന്നറിയിപ്പ് നൽകി ഹെൽത്ത് കാനഡ. വ്യാജ മരുന്നുകൾക്കെതിരായ അന്താരാഷ്ട്ര നടപടിയുടെ ഭാഗമായി ആയിരക്കണക്കിന് പായ്ക്കറ്റുകൾ രാജ്യത്ത് പ്രവേശിക്കുന്നതിന് മുമ്പ് തടയുകയും ഒപ്പം രാജ്യത്ത് എത്തിയതിന് ശേഷം പിടിച്ചെടുക്കുകയോ ചെയ്തിട്ടുണ്ട്. ഇതിന് പിന്നാലെയാണ് മുന്നറിയിപ്പ് നൽകിയത്.
2024 ഡിസംബർ 16 മുതൽ 2025 മെയ് 16 വരെ, ഇന്റർപോൾ 90 രാജ്യങ്ങളിലായി നടത്തിയ ഒരു ഓപ്പറേഷൻ വഴി 88 മില്യൺ ഡോളറിലധികം വിലമതിക്കുന്ന 50.4 ദശലക്ഷം ഡോസ് അനധികൃത മരുന്നുകൾ പിടിച്ചെടുത്തിട്ടുണ്ട്. 769 പ്രതികളെ അറസ്റ്റ് ചെയ്യുകയും ചെയ്തു.
ലോകമെമ്പാടുമുള്ള 123 ക്രിമിനൽ ഗ്രൂപ്പുകളെ ഇല്ലാതാക്കുകയും ചെയ്തെന്നും ഇത് സംഘടനയുടെ ചരിത്രത്തിലെ ഏറ്റവും വലിയ പിടിച്ചെടുക്കലാണെന്നും അധികൃതർ പറയുന്നു.
വ്യാജവും അംഗീകൃതമല്ലാത്തതുമായ മരുന്നുകൾ പൊതുജനാരോഗ്യത്തിന് ഗുരുതരമായ അപകടമാണ് ഉണ്ടാക്കുന്നത്. അവയിൽ അപകടകരമായതോ നിയമവിരുദ്ധമോ ആയ ചേരുവകൾ ഉൾപ്പെട്ടേക്കാം. അത് ഗുരുതരമായ രോഗത്തിനോ മരണത്തിനോ പോലും കാരണമാകുമെന്ന് ഇന്റർപോൾ ഉദ്യേഗസ്ഥനായ ഡേവിഡ് കൗണ്ടർ പറഞ്ഞു.
