യു എസിൽ വീസ കാലാവധി നീട്ടുന്നതിനും തൊഴിൽ അനുമതിക്കുമുള്ള പ്രധാനപ്പെട്ട രണ്ട് കുടിയേറ്റ ഫോമുകൾ യു എസ് സിറ്റിസൺഷിപ്പ് ആൻഡ് ഇമ്മിഗ്രേഷൻ സർവീസസ് (USCIS) പരിഷ്കരിക്കുന്നു. സെപ്റ്റംബർ 15 മുതൽ പുതിയ പതിപ്പിലുള്ള ഫോമുകൾ മാത്രമായിരിക്കും അധികൃതർ ഔദ്യോഗികമായി സ്വീകരിക്കുക.
പഴയ പതിപ്പുകൾ ഉപയോഗിച്ച് സമർപ്പിക്കുന്ന അപേക്ഷകൾ യാതൊരുവിധ മുന്നറിയിപ്പുമില്ലാതെ തള്ളിക്കളയാൻ സാധ്യതയുണ്ടെന്ന് അധികൃതർ മുന്നറിയിപ്പ് നൽകി. എച്ച്-1ബി (H-1B) വീസ ഉടമകളുടെ കുടുംബാംഗങ്ങൾ, രാജ്യാന്തര വിദ്യാർത്ഥികൾ, എക്സ്ചേഞ്ച് വിസിറ്റർമാർ തുടങ്ങി യു എസിലെ നോൺ-ഇമ്മിഗ്രൻ്റ് വീസകളിൽ കഴിയുന്ന ലക്ഷക്കണക്കിന് ആളുകളെയാണ് ഈ പുതിയ തീരുമാനം നേരിട്ട് ബാധിക്കുന്നത്. യു.എസിൽ ജോലി ചെയ്യുന്നതിനായി എംപ്ലോയ്മെൻ്റ് ഓതറൈസേഷൻ ഡോക്യുമെൻ്റ് (EAD) അഥവാ വർക്ക് പെർമിറ്റ് നേടാൻ ഉപയോഗിക്കുന്ന പ്രധാന രേഖയാണ് ‘ഫോം ഐ-765’ (Form I-765). സെപ്റ്റംബർ 15 ഓടുകൂടി തികച്ചും പുതിയ പതിപ്പാണ് USCIS അവതരിപ്പിക്കുന്നത്. സെപ്റ്റംബർ 15ന് മുമ്പ് സമർപ്പിക്കുകയോ പോസ്റ്റ്മാർക്ക് ചെയ്യുകയോ ചെയ്യുന്ന പഴയ ഫോമുകൾ സ്വീകരിക്കും. എന്നാൽ ആ തിയതിക്ക് ശേഷം അപേക്ഷിക്കുന്നവർ നിർബന്ധമായും പുതിയ പതിപ്പ് തന്നെ ഉപയോഗിക്കണം. പഴയ ‘ഫോം ഐ-765’ ഉപയോഗിക്കുന്നവർക്ക് യാതൊരുവിധ ഗ്രേസ് പിരീഡും (ഇളവ് കാലയളവ്) അനുവദിക്കില്ലെന്ന് അധികൃതർ വ്യക്തമാക്കിയിട്ടുണ്ട്.
യു.എസിൽ നിലവിൽ കഴിയുന്ന നോൺ-ഇമ്മിഗ്രൻ്റ് വിഭാഗങ്ങൾക്ക് തങ്ങളുടെ വീസ കാലാവധി നീട്ടുന്നതിനോ അല്ലെങ്കിൽ വീസ പദവി മാറ്റുന്നതിനോ സഹായിക്കുന്നതാണ് ‘ഫോം ഐ-539’ (Form I-539). എച്ച്-1ബി വീസക്കാരുടെ കുടുംബാംഗങ്ങളായ എച്ച്-4 (H-4) ജീവിതപങ്കാളികൾക്കും കുട്ടികൾക്കും ഇത് വളരെ പ്രധാനപ്പെട്ട ഒന്നാണ്. തങ്ങളുടെ ഡിപൻഡൻ്റ് പദവി നീട്ടുന്നതിനോ മാറ്റുന്നതിനോ ഇവർ ഈ ഫോം ഉപയോഗിക്കേണ്ടതുണ്ട്. മാറ്റങ്ങൾ എന്തൊക്കെയാണെന്ന് അപേക്ഷകർക്ക് മുൻകൂട്ടി മനസ്സിലാക്കുന്നതിനായി USCIS ഇതിനോടകം തന്നെ പുതിയ ഫോമുകളുടെ പ്രിവ്യൂ കോപ്പികൾ ഔദ്യോഗിക വെബ്സൈറ്റിൽ ലഭ്യമാക്കിയിട്ടുണ്ട്.
