എഡ്മന്റൺ: ആൽബെർട്ടയിലെ രണ്ട് പ്രധാന നഗരങ്ങളായ കാൽഗറിയിലും എഡ്മന്റണിലും താമസിക്കുന്നവർക്ക് സന്തോഷവാർത്ത. ഇരുനഗരങ്ങളിലും ശരാശരി വാടക വില കുറഞ്ഞിരിക്കുകയാണ്. കാനഡയിലുടനീളം വാടക നിരക്കിൽ കുറവ് രേഖപ്പെടുത്തിയിട്ടുണ്ട്. Rentals.ca, Urbanation എന്നിവയിൽ നിന്നുള്ള ഏറ്റവും പുതിയ നാഷണൽ റെന്റ് റിപ്പോർട്ട് അനുസരിച്ച്, മുൻ വർഷത്തെ അപേക്ഷിച്ച് കാനഡയിലുടനീളം വാടക 3.3 ശതമാനം കുറഞ്ഞു.

കാനഡയിലെ ഏറ്റവും വലിയ നഗരങ്ങളിൽ വാർഷിക വാടക നിരക്കിൽ ഏറ്റവും കൂടുതൽ ഇടിവ് അനുഭവപ്പെട്ടത് കാൽഗറിയിലാണ്. കാൽഗറിയിൽ വൺ ബെഡ് റൂം അപ്പാർട്ട്‌മെന്റുകളുടെ വാടക കഴിഞ്ഞ വർഷത്തെ അപേക്ഷിച്ച് 8.2 ശതമാനം കുറഞ്ഞ് ശരാശരി പ്രതിമാസ വാടക 1,591 ഡോളറായി. ടു ബെഡ്‌റൂം യൂണിറ്റുകളുടെ വാടക നിരക്ക് 9.2 ശതമാനം കുറഞ്ഞ് പ്രതിമാസം 1,944 ഡോളറായി.

അതേസമയം, ആൽബെർട്ടയിലെ മറ്റ് പ്രധാന നഗരങ്ങളെപ്പോലെ എഡ്മന്റണിൽ വാടക നിരക്ക് കുറഞ്ഞിട്ടില്ല. എന്നാൽ കഴിഞ്ഞ വർഷത്തെ അപേക്ഷിച്ച് മികച്ച വിലകളാണ് ഈ വർഷം. ഒരു വൺ- ബെഡ്‌റൂം യൂണിറ്റിന് എഡ്മന്റണിൽ വാടക നിരക്ക് 2.3 ശതമാനം കുറഞ്ഞു. അതിനാൽ ശരാശരി വാടക നിരക്ക് പ്രതിമാസം 1,336 ഡോളറാണ്. ടു-ബെഡ്‌റൂം യൂണിറ്റിന് 0.7 ശതമാനം വില കുറഞ്ഞ് ശരാശരി പ്രതിമാസ വാടക 1,679 ഡോളറായി.