ഓട്ടവ: ലോകമെമ്പാടുമുള്ള ആളുകൾ പോകാൻ ആഗ്രഹിക്കുന്ന സ്വപ്ന സ്ഥലങ്ങളുടെ പട്ടികയിൽ കാനഡ ഒന്നാം സ്ഥാനം കരസ്ഥമാക്കി. ആളുകൾ ഏറ്റവും കൂടുതൽ മാറിത്താമസിക്കാൻ ഇഷ്ടപ്പെടുന്ന, സ്വപ്നം കാണുന്ന രാജ്യങ്ങളുടെ പട്ടിക ഇന്റർനാഷണൽ മണി ട്രാൻസ്ഫർ സർവീസ് ആയ റെമിറ്റ്ലിയാണ് പുറത്തുവിട്ടത്. 26 രാജ്യങ്ങളിലായി 4,800 ലധികം ആളുകളെയാണ് സർവേ ചെയ്തത്. ഇഷ്ടപ്പെടുന്ന രാജ്യങ്ങളിൽ പുതിയ ജീവിതം ആരംഭിക്കാനുള്ള ആളുകളുടെ സ്വപ്നങ്ങൾക്ക് പിന്നിലെ പ്രചോദനങ്ങളെ അടിസ്ഥാനമാക്കിയാണ് പട്ടിക തയാറാക്കിയിരിക്കുന്നത്.
തിരക്കുകളില്ലാത്ത ജീവിതം, മെച്ചപ്പെട്ട വർക്ക്-ലൈഫ് ബാലൻസ്, മികച്ച തൊഴിൽ അവസരങ്ങൾ എന്നിവയെല്ലാം പരിഗണിച്ചിരുന്നു. ജീവിത നിലവാരം, ജീവിതശൈലി, തൊഴിലവസരങ്ങൾ, വൈവിധ്യമാർന്ന ഭൂപ്രകൃതി, സ്വാഗതാർഹമായ സമൂഹങ്ങൾ എന്നിങ്ങനെയാണ് എന്നിവയാണ് തങ്ങളുടെ സ്വപ്ന ലക്ഷ്യസ്ഥാനം കണ്ടെത്താൻ അടിസ്ഥാനമാക്കിയതെന്ന് സർവേയിൽ പങ്കെടുത്തവർ പറഞ്ഞു. മികച്ച വിദ്യാഭ്യാസം, ആരോഗ്യ സംരക്ഷണം, സുരക്ഷിതമായ നഗരങ്ങൾ, ഔട്ട്ഡോർ ആക്റ്റിവിറ്റികൾക്കുള്ള അവസരങ്ങൾ എന്നിവയിലൂടെ കാനഡ നിരവധി ആളുകൾക്ക് സ്വപ്നരാജ്യമായി മാറുന്നു. ആളുകൾ അന്വേഷിക്കുന്ന സ്ഥിരതയും സന്തുലിതാവസ്ഥയും കാനഡ വാഗ്ദാനം ചെയ്യുന്നുണ്ടെന്ന് റിപ്പോർട്ടിൽ പറയുന്നു.
കാനഡയിലേക്ക് മാറാൻ ആഗ്രഹിക്കുന്നതിന്റെ കാരണം സൗഹൃദപരമായ കനേഡിയൻ സംസ്കാരമാണെന്നും ചിലർ പ്രതികരിച്ചു. തങ്ങളുടെ മുൻ പഠനത്തിൽ ലോകത്തിലെ ഏറ്റവും സൗഹൃദപരമായ രാജ്യങ്ങളിൽ ഒന്നായിരുന്നു കാനഡയെന്നും റിപ്പോർട്ടിൽ ചൂണ്ടിക്കാട്ടി.
