സര്ക്കാര് ചെലവുകള്ക്കായുള്ള ധനാനുമതി ബില് വീണ്ടും പാസാകാതെ വന്നതോടെ യുഎസ് അടച്ചുപൂട്ടല് രണ്ടാം ദിനവും തുടരുന്നു. വിവിധ മേഖലകള് സ്തംഭിച്ച അവസ്ഥയിലാണ്. സര്ക്കാര് ചിലവുകള്ക്കായുള്ള ധന അനുമതി ബില് ഇന്നലെ വീണ്ടും സെനറ്റില് പരാജയപ്പെട്ടതോടെ, ലക്ഷക്കണക്കിന് സര്ക്കാര് ജീവനക്കാര് പ്രതിസന്ധിയിലായി. ഇവരെ പിരിച്ചുവിടുമെന്ന മുന്നറിയിപ്പ് വൈറ്റ് ഹൗസ് ആവര്ത്തിച്ചു.
ആരോഗ്യസേവനം, അതിര്ത്തി സുരക്ഷ, വ്യോമയാനം തുടങ്ങിയ അവശ്യസര്വീസ് ഒഴികെയുളള സര്ക്കാര് സേവനങ്ങളെല്ലാം തടസപ്പെട്ടിരിക്കുകയാണ്. ശമ്പളം കൊടുക്കാനും ദൈനംദിന കാര്യങ്ങള്ക്കും വകുപ്പുകള്ക്ക് പണമില്ലാതായതോടെ ഏഴര ലക്ഷം ഫെഡറല് ജീവനക്കാര് ശമ്പള രഹിത നിര്ബന്ധിത അവധിയിലേക്ക് പ്രവേശിച്ചു. യുഎസ് സമ്പദ്വ്യവസ്ഥയ്ക്ക് കോടികളുടെ നഷ്ടമാണ് ഉണ്ടായിരിക്കുന്നത്.
സബ്സിഡി പദ്ധതികളുടെ നടത്തിപ്പും അവതാളത്തിലാകും. ദേശീയ പാര്ക്കുകള്, മ്യൂസിയങ്ങള്, പാസ്പോര്ട്ട്, വീസ സേവനങ്ങള് തുടങ്ങിയവയുടെ പ്രവര്ത്തനം നിലയ്ക്കും. രാജ്യത്തിന്റെ സാമ്പത്തിക വളര്ച്ചയിലും ഇതിന്റെ പ്രതിഫലനം ഉണ്ടാകും. 2018 ല് ട്രംപിന്റെ ആദ്യ ഭരണകാലത്ത് 35 ദിവസം അമേരിക്ക അടച്ചുപൂട്ടിയിരുന്നു. 1981-ന് ശേഷം പതിനാഞ്ചാമത്തെ അടച്ചു പൂട്ടലിനാണ് അമേരിക്ക സാക്ഷ്യം വഹിക്കുന്നത്.
