ആൽബർട്ടയിൽ നിന്നും ബ്രിട്ടീഷ് കൊളംബിയ തീരത്തേക്കുള്ള ബിറ്റുമെൻ പൈപ്പ്ലൈൻ പദ്ധതി സ്വകാര്യ മേഖലയെ മാത്രം വിശ്വസിച്ച് മുന്നോട്ട് കൊണ്ടുപോകാനാവില്ലെന്ന് മുൻ ആൽബർട്ട ഊർജ്ജ മന്ത്രി സോണിയ സാവേജ്. ഫെഡറൽ സർക്കാർ സാമ്പത്തിക ഗ്യാരണ്ടി നൽകിയാൽ മാത്രമേ സ്വകാര്യ കമ്പനികൾ ഇത്തരം വലിയ പദ്ധതികൾക്ക് തയ്യാറാവുകയുള്ളൂ എന്ന് സാവേജ് ചൂണ്ടിക്കാട്ടി. 1950-കളിലും 70-കളിലും സമാനമായ പൈപ്പ്ലൈൻ പദ്ധതികൾക്ക് സർക്കാർ പിന്തുണ ആവശ്യമായി വന്നിട്ടുണ്ടെന്നും അവർ ഓർമ്മിപ്പിച്ചു. അതേസമയം, പൈപ്പ്ലൈനിന് പകരം കോടിക്കണക്കിന് ഡോളർ ചിലവിട്ട് പുതിയ ഓയിൽ റിഫൈനറി സ്ഥാപിക്കുന്നതിനെക്കുറിച്ചാണ് ബ്രിട്ടിഷ് കൊളംബിയ പ്രീമിയർ ഡേവിഡ് എബി ആലോചിക്കുന്നത്. ഇത് പ്രായോഗികമല്ലെന്നും വെറും ശ്രദ്ധതിരിക്കൽ മാത്രമാണെന്നും സാവേജ് വിമർശിച്ചു.
വെനസ്വേലയിലെ രാഷ്ട്രീയ മാറ്റങ്ങളുടെ പശ്ചാത്തലത്തിൽ, കാനഡയുടെ എണ്ണ വിപണി സംരക്ഷിക്കാൻ പൈപ്പ്ലൈൻ നിർമ്മാണം വേഗത്തിലാക്കണമെന്ന് പ്രീമിയർ ഡാനിയേൽ സ്മിത്ത് പ്രധാനമന്ത്രി മാർക്ക് കാർണിയോട് ആവശ്യപ്പെട്ടിരുന്നു. പൈപ്പ്ലൈൻ പദ്ധതികൾക്ക് ആറ് മാസത്തിനുള്ളിൽ അനുമതി നൽകണമെന്നാണ് ആൽബർട്ടയുടെ ആവശ്യം. ആഗോള വിപണിയിൽ എണ്ണവില കുറയുന്ന സാഹചര്യത്തിൽ, കാനഡയുടെ ഊർജ്ജ മേഖലയുടെ മത്സരക്ഷമത ഉറപ്പാക്കാൻ സർക്കാർ ഉടൻ ഇടപെടണമെന്ന ആവശ്യവും ശക്തമാണ്.
