ഗ്രേറ്റർ ടൊറന്റോ മേഖലയിൽ ശക്തമായ കാലാവസ്ഥാ വ്യതിയാനത്തിന് സാധ്യതയെന്ന് മുന്നറിയിപ്പ്. ആൽബർട്ട ക്ലിപ്പർ എന്ന ന്യൂനമർദ്ദത്തിന്റെ ഫലമായി ബുധനാഴ്ച ഉച്ചയോടെ നഗരത്തിൽ കനത്ത മഞ്ഞുവീഴ്ചയും കടുത്ത തണുപ്പും അനുഭവപ്പെടുമെന്ന് എൻവയൺമെന്റ് കാനഡ മുന്നറിയിപ്പ് നൽകി. നിലവിൽ നേരിയ മഴയും മഞ്ഞും തുടരുന്നുണ്ടെങ്കിലും ബുധനാഴ്ച ഉച്ചയ്ക്ക് ശേഷം താപനില 4 ഡിഗ്രി സെൽഷ്യസിൽ നിന്നും അതിവേഗം കുറയും. വൈകുന്നേരത്തോടെ താപനില -5 ഡിഗ്രി സെൽഷ്യസിലെത്തുകയും കാറ്റുകാരണം തണുപ്പ് -11 ഡിഗ്രി സെൽഷ്യസായി അനുഭവപ്പെടുകയും ചെയ്യും. ജോർജിയൻ ബേ, ലേക്ക് ഹ്യൂറോൺ മേഖലകളിൽ മഞ്ഞുവീഴ്ച ശക്തമാകുമെങ്കിലും ടൊറന്റോയിൽ 1 മുതൽ 3 സെന്റീമീറ്റർ വരെ നേരിയ മഞ്ഞുവീഴ്ച മാത്രമാണ് പ്രതീക്ഷിക്കുന്നത്.
വ്യാഴാഴ്ച രാവിലെയോടെ ഈ സീസണിലെ ഏറ്റവും കുറഞ്ഞ താപനിലയിലേക്ക് ടൊറന്റോ മാറും. താപനില -15 ഡിഗ്രി സെൽഷ്യസായി കുറയുമെങ്കിലും കാറ്റുകൂടി ചേരുമ്പോൾ അത് -20 ഡിഗ്രി സെൽഷ്യസിന് മുകളിലുള്ള കൊടും തണുപ്പായി മാറുമെന്നും ഏജൻസി അറിയിച്ചു. വ്യാഴാഴ്ച പകൽ സമയം മുഴുവൻ തണുപ്പ് -18 ഡിഗ്രി സെൽഷ്യസിനടുത്ത് തന്നെ തുടരാനാണ് സാധ്യത. ഇടയ്ക്ക് താപനിലയിൽ നേരിയ വർധന ഉണ്ടായേക്കാമെങ്കിലും ഈ മാസാവസാനം വരെ അതിശൈത്യം തുടരുമെന്നാണ് കാലാവസ്ഥാ നിരീക്ഷകർ കണക്കാക്കുന്നത്. പെട്ടെന്നുണ്ടാകുന്ന ഈ മാറ്റം കണക്കിലെടുത്ത് യാത്രക്കാർക്കും പൊതുജനങ്ങൾക്കും ജാഗ്രതാ നിർദ്ദേശം നൽകിയിട്ടുണ്ട്.
