ദുരന്ത നിവാരണ പ്രവർത്തനങ്ങൾ ഏകോപിപ്പിക്കുന്നതിന് കാനഡയിൽ പുതിയ ഓപ്പറേഷൻസ് സെന്ററിനു രൂപം നൽകുമെന്ന് ഫെഡറൽ സർക്കാർ പ്രഖ്യാപിച്ചു. നാസയുടെ മിഷൻ കൺട്രോൾ റൂം മാതൃകയിലായിരിക്കും പ്രധാന കേന്ദ്രമായ ‘ഓപ്പറേഷണൽ സെന്റർ’ രൂപകൽപ്പന ചെയ്യുക. അഞ്ഞൂറിലധികം വിവരസ്രോതസ്സുകളുമായി ബന്ധിപ്പിച്ച രണ്ട് നിലയോളം ഉയരമുള്ള സ്‌ക്രീനുകളും ഇതിൽ ഉൾപ്പെടുന്നു. 80 പേർക്ക് ഇരിക്കാനുള്ള സൗകര്യവും ഒരേ സമയം ഒന്നിലധികം അടിയന്തരാവസ്ഥകൾ കൈകാര്യം ചെയ്യാനുള്ള ശേഷിയും ഈ കേന്ദ്രത്തിനുണ്ടെന്ന് സർക്കാർ അറിയിച്ചു.
വിവിധ ഏജൻസികളിൽ നിന്നുള്ള ഉദ്യോഗസ്ഥരെയെല്ലാം ഏകോപിപ്പിക്കുന്നതു വഴി കാട്ടുതീ, വെള്ളപ്പൊക്കം, ഭീകരാക്രമണങ്ങൾ പോലുള്ള പ്രതിസന്ധികളിൽ രാജ്യമെമ്പാടുമുള്ള പ്രവർത്തനങ്ങൾ എളുപ്പത്തിൽ നിയന്ത്രിക്കാൻ സഹായിക്കുമെന്ന് എമർജൻസി മാനേജ്‌മെന്റ് മന്ത്രി എലീനർ ഓൾഷെവ്സ്കി വ്യക്തമാക്കി. പ്രവിശ്യകൾക്ക് സഹായം ആവശ്യമുള്ളപ്പോൾ വിഭവങ്ങൾ ഏകോപിപ്പിച്ച് നൽകാനാണ് കേന്ദ്രം ശ്രമിക്കുന്നതെന്ന് ഓൾഷെവ്സ്കി അറിയിച്ചു. കേന്ദ്രത്തിൽ ഏകദേശം 150 ജീവനക്കാർ ജോലി ചെയ്യുമെന്നും മന്ത്രി കൂട്ടിച്ചേർത്തു.
