ട്വന്റി20 ലോകകപ്പിലെ മിന്നും പ്രകടനത്തിലൂടെ ഇന്ത്യയെ കിരീടത്തിലേക്ക് നയിച്ച മലയാളി താരം സഞ്ജു സാംസണിന് സംസ്ഥാന സർക്കാർ തിരുവനന്തപുരത്ത് ഔദ്യോഗിക സ്വീകരണം നൽകും. സഞ്ജുവിന്റെ നേട്ടത്തിൽ അഭിനന്ദനവുമായി മുഖ്യമന്ത്രി പിണറായി വിജയനും മറ്റ് മന്ത്രിമാരും നേരത്തെ രംഗത്തെത്തിയിരുന്നു. ന്യൂസിലൻഡിനെതിരെയുള്ള ആവേശകരമായ ഫൈനലിലെ വിജയം ഓരോ ഇന്ത്യക്കാരന്റെയും അഭിമാന നിമിഷമാണെന്ന് മുഖ്യമന്ത്രി പറഞ്ഞു. ടൂർണമെന്റിലുടനീളം ബാറ്റിങ്ങിൽ പുലർത്തിയ സ്ഥിരതയും ഫൈനലിലെ നിർണ്ണായക പ്രകടനവും സഞ്ജുവിനെ ടീമിന്റെ നട്ടെല്ലായി മാറ്റിയെന്നും അദ്ദേഹം ഫെയ്സ്ബുക്കിൽ കുറിച്ചു. ലോകകപ്പ് നേട്ടത്തിൽ സഞ്ജുവിന്റെ പങ്ക് ഓരോ മലയാളിക്കും ആവേശം പകരുന്നതാണെന്നും മുഖ്യമന്ത്രി കൂട്ടിച്ചേർത്തു.
പ്രതിഭയും കഠിനാധ്വാനവും ഒത്തുചേർന്നാൽ ഏത് വലിയ ലക്ഷ്യവും കീഴടക്കാമെന്ന് സഞ്ജു തെളിയിച്ചതായി മുഖ്യമന്ത്രി പ്രശംസിച്ചു. ലോകചാമ്പ്യന്മാരായ ടീം ഇന്ത്യക്കും വിജയശില്പികളിലൊരാളായ സഞ്ജുവിനും അദ്ദേഹം ഹൃദയം നിറഞ്ഞ അഭിനന്ദനങ്ങൾ നേർന്നു. സഞ്ജുവിനെ വരവേൽക്കാൻ തലസ്ഥാന നഗരിയിൽ വിപുലമായ ഒരുക്കങ്ങളാണ് കായിക വകുപ്പിന്റെ നേതൃത്വത്തിൽ നടക്കുന്നത്.
