കാനഡ ബോർഡർ സർവീസസ് ഏജൻസിയുടെ (സിബിഎസ്എ) പ്രാഥമിക പരിശോധനാ കിയോസ്ക്കുകളുടെ തകരാർ മൂലം വലഞ്ഞ് യാത്രക്കാർ. കിയോസ്ക്കുകളിലെ സിസ്റ്റം തകരാർ കാരണം ഒന്നിലധികം കനേഡിയൻ വിമാനത്താവളങ്ങളിലെ യാത്രക്കാർക്ക് കാലതാമസം നേരിട്ടതായി സിബിഎസ്എ വക്താവ് അറിയിച്ചു. പതിവ് സിസ്റ്റം അറ്റകുറ്റപ്പണികൾക്കിടെ അപ്രതീക്ഷിതമായ സാങ്കേതിക പ്രശ്നം മൂലമാണ് ഈ തടസ്സം ഉണ്ടായതെന്നും കഴിയുന്നത്ര വേഗത്തിൽ കണക്റ്റിവിറ്റി പുനഃസ്ഥാപിക്കാൻ പ്രവർത്തിക്കുന്നതായും സിബിഎസ്എ പറഞ്ഞു. കാനഡയിലുടനീളം കിയോസ്ക് തടസ്സപ്പെടുന്നതും യാത്രക്കാരെ ബാധിക്കുന്നതും ഇതാദ്യമല്ല. ഏപ്രിൽ , ജൂൺ മാസങ്ങളിലെ തകരാറുകൾ ചില പ്രധാന കനേഡിയൻ വിമാനത്താവളങ്ങളിൽ കാലതാമസത്തിന് കാരണമായിട്ടുണ്ട്.
കസ്റ്റംസിൽ സാധാരണയേക്കാൾ കൂടുതൽ സമയം കാത്തിരിക്കേണ്ടിവരുമെന്ന് യാത്രക്കാർക്ക് സിബിഎസ്എ മുന്നറിയിപ്പ് നൽകി. യാത്രക്കാരുടെ വിവരങ്ങൾ പ്രോസസ്സ് ചെയ്യൽ വേഗത്തിലാക്കാനും, കാലതാമസം കുറയ്ക്കാനും ആവശ്യാനുസരണം പരിശോധനകൾ പൂർത്തിയാക്കാനും സിബിഎസ്എ വിമാനത്താവള മാനേജ്മെന്റുമായി ചേർന്ന് പ്രവർത്തിക്കുന്നുണ്ടെന്ന് ഏജൻസി വക്താവ് പറഞ്ഞു.
