പാം സ്പ്രിങ്സില് ഇന്ന് രാവിലെ കാര് പൊട്ടിത്തെറിച്ചുണ്ടായ അപകടത്തില് ഒരാള് മരിച്ചു. സ്ഫോടനത്തില് പ്രദേശത്തെ ഫെര്ട്ടിലിറ്റി ക്ലിനിക്കിന് കേടുപാടുകള് സംഭവിച്ചതായും പാം സ്പ്രിങ്സ് പൊലീസ് അറിയിച്ചു. പ്രാദേശിക സമയം രാവിലെ 11:00 മണിയോടെ പാം സ്പ്രിങ്സ് നഗരമധ്യത്തിന് രണ്ട് കിലോമീറ്റര് അകലെയാണ് സ്ഫോടനം നടന്നത്. അമേരിക്കന് റീപ്രൊഡക്ടീവ് സെന്ററുകള് ഉള്പ്പെടെ നിരവധി സ്ഥാപനങ്ങള്ക്ക് സമീപമായിരുന്നു ഇത്.
സ്ഫോടനത്തില് തങ്ങളുടെ സ്ഥാപനത്തിലെ ആര്ക്കും പരുക്കില്ലെന്നും എന്നാല് ഒരാള് മരിക്കുകയും നിരവധി പേര്ക്ക് പരുക്കേല്ക്കുകയും ചെയ്തുവെന്നും ഫെര്ട്ടിലിറ്റി ക്ലിനിക്ക് പ്രസ്താവനയില് അറിയിച്ചു. സ്ഫോടനത്തില് നിരവധി കെട്ടിടങ്ങള്ക്ക് കേടുപാടുകള് സംഭവിച്ചതായി പൊലീസ് ചീഫ് ആന്ഡി മില്സ് വ്യക്തമാക്കി. മരിച്ചയാളെ തിരിച്ചറിഞ്ഞിട്ടില്ലെന്നും അദ്ദേഹം കൂട്ടിച്ചേര്ത്തു.
മരണം സ്ഥിരീകരിച്ച പാം സ്പ്രിങ്സ് പൊലീസ്, സംഭവം ആസൂത്രിതമായ അക്രമമാണെന്ന് പറഞ്ഞു. എന്നാല് കൂടുതല് വിവരങ്ങള് പുറത്തുവിട്ടിട്ടില്ല.
