ഒട്ടാവ: കനേഡിയൻ സർക്കാർ മിനിമം വേതനം വർധിപ്പിച്ചതോടെ ഇന്ത്യക്കാർ ഉൾപ്പെടെ മധ്യവർഗത്തിന് ആശ്വാസം. സ്വകാര്യ മേഖലയിൽ ജോലി ചെയ്യുന്നവർക്കുള്ള ഫെഡറൽ മിനിമം വേതന നിരക്ക് കനേഡിയൻ സർക്കാർ ഉയർത്തിയതിനാൽ ഉയർന്ന ജീവിതച്ചെലവുകൾക്കിടയിലും കാനഡയിൽ പഠിക്കുകയും താമസിക്കുകയും ചെയ്യുന്ന ഇന്ത്യക്കാർക്ക് കുറച്ച് ആശ്വാസം ലഭിക്കും. ഏപ്രിൽ 1 മുതൽ, ഫെഡറൽ നിയന്ത്രിത സ്വകാര്യ മേഖലയിൽ ജോലി ചെയ്യുന്നവർക്ക് കാനഡയിൽ മിനിമം വേതനം മണിക്കൂറിന് 17.30 കനേഡിയൻ ഡോളറിൽ നിന്ന് 17.75 ഡോളറായി ഉയർത്തി.
ഫെഡറൽ മിനിമം വേതനം കനേഡിയൻ തൊഴിലാളികൾക്കും ബിസിനസുകൾക്കും ഒരുപോലെ സ്ഥിരതയും ഉറപ്പും നൽകുന്നുവെന്നും ബോർഡിലുടനീളം വരുമാന അസമത്വം കുറയ്ക്കാൻ സഹായിക്കുന്നതിനോടൊപ്പം കൂടുതൽ ന്യായമായ സമ്പദ്വ്യവസ്ഥ കെട്ടിപ്പടുക്കുന്നതിലേക്ക് ഒരു പടി കൂടി അടുപ്പിക്കുന്നുവെന്ന് തൊഴിൽ മന്ത്രി സ്റ്റീവൻ മക്കിന്നൺ പറഞ്ഞു.
തൊഴിലുടമകൾക്ക് അവരുടെ പേയ്റോൾ സംവിധാനങ്ങൾ അപ്ഡേറ്റ് ചെയ്യാനും ഇന്റേണുകൾ ഉൾപ്പെടെ എല്ലാ ജീവനക്കാർക്കും അപ്ഗ്രേഡ് ചെയ്ത നിരക്കിൽ വേതനം ലഭിക്കുന്നുണ്ടെന്ന് ഉറപ്പാക്കാനും നിർദ്ദേശം നൽകിയിട്ടുണ്ട്. മുൻ വർഷത്തെ അപേക്ഷിച്ച് കാനഡയുടെ വാർഷിക ശരാശരി ഉപഭോക്തൃ വില സൂചികയെ അടിസ്ഥാനമാക്കി എല്ലാ വർഷവും ഏപ്രിൽ 1ന് ഫെഡറൽ മിനിമം വേതന നിരക്ക് ക്രമീകരിക്കും. ഭക്ഷ്യബാങ്കുകൾ അന്താരാഷ്ട്ര വിദ്യാർഥികളെ പരിഗണിക്കുന്നത് ഒഴിവാക്കിയോതോടെ കാനഡയിൽ താമസിക്കുന്ന ചിലർക്ക് മിനിമം വേതന നിരക്കിലെ വർധനവ് സ്വാഗതാർഹമായിരിക്കും. പണപ്പെരുപ്പം വർധിച്ചത് ജസ്റ്റിൻ ട്രൂഡോ സർക്കാരിനെതിരായ പ്രധാന വിമർശനമായിരുന്നതിനു പുറമേ 2025ലെ കനേഡിയൻ തിരഞ്ഞെടുപ്പിൽ ഇത് പ്രധാന വിഷയമായിരിക്കും.
മിനിമം വേതനത്തിലെ 2.4 ശമതാനം വർധനവ് ഇന്ത്യക്കാരെയും സഹായിക്കും. കനേഡിയൻ ജനസംഖ്യയുടെ 3.7 ശതമാനം വരുന്ന ഇന്ത്യക്കാർക്ക് ഈ വർധനവിൽ നിന്ന് ധാരാളം നേട്ടങ്ങളുണ്ട്. ഒരു റിപ്പോർട്ട് അനുസരിച്ച്, കാനഡയിലെ ഗിഗ് തൊഴിലാളികളിൽ ഭൂരിഭാഗവും കുടിയേറ്റക്കാരാണ്. 2005 മുതൽ 2020 വരെ, എല്ലാ കനേഡിയൻ തൊഴിലാളികളുടെയും വിഹിതം 5.05 ശതമാനത്തിൽ നിന്ന് 10 ശതമാനം ആയി വളർന്നു. കാനഡയിലെ ഇന്ത്യക്കാർ റീട്ടെയിൽ, ആരോഗ്യ സംരക്ഷണം, നിർമ്മാണം, കാനഡയിലെ മറ്റ് നിരവധി മേഖലകൾ എന്നിവയിലാണ് ജോലി ചെയ്യുന്നത്.
തൊഴിലാളികൾക്ക് മാത്രമല്ല, ഇന്ത്യൻ വിദ്യാർഥികൾക്കും പോലും ഈ വർധനവിന്റെ പ്രയോജനം ലഭിക്കും. കമ്പ്യൂട്ടർ സയൻസ്, ബിസിനസ്, എഞ്ചിനീയറിംഗ്, ആരോഗ്യ ശാസ്ത്രം, ഐടി എന്നീ മേഖലകളിൽ ഉന്നത പഠനം നടത്തുന്നതിന് ഇന്ത്യൻ വിദ്യാർഥികൾക്ക് കാനഡ മികച്ച ലക്ഷ്യസ്ഥാനമായി കണക്കാക്കപ്പെടുന്നു. കൂടാതെ അവിടത്തെ ഇന്ത്യൻ തൊഴിൽ ശക്തി ഇൻഫർമേഷൻ ടെക്‌നോളജി (ഐടി), എഞ്ചിനീയറിംഗ്, ആരോഗ്യ സംരക്ഷണം, ബിസിനസ്, ധനകാര്യ മേഖലകളിൽ ഉയർന്ന പ്രാതിനിധ്യം വഹിക്കുന്നു. കനേഡിയൻ ബ്യൂറോ ഓഫ് ഹയർ എഡ്യൂക്കേഷന്റെ കണക്കനുസരിച്ച്, 2021ൽ ഇന്ത്യൻ വിദ്യാർഥികൾ കനേഡിയൻ സമ്പദ്വ്യവസ്ഥയിലേക്ക് ഏകദേശം 4.9 ബില്യൺ ഡോളർ സംഭാവന ചെയ്യുമെന്നും കാനഡയിലെ ഏറ്റവും വലിയ അന്താരാഷ്ട്ര വിദ്യാർഥി ഗ്രൂപ്പാണെന്നും പറയുന്നു.
