ക്യുബെക്കിന് പുറത്തുള്ള കാനഡയിലെ മറ്റു പ്രവിശ്യകളിലേക്കുള്ള ഫ്രഞ്ച് ഭാഷാ കുടിയേറ്റത്തിൽ (Francophone Immigration) രാജ്യം നിശ്ചയിച്ച ലക്ഷ്യം തുടർച്ചയായ നാലാം വർഷവും മറികടന്നതായി കാനഡ ഇമിഗ്രേഷൻ മന്ത്രി ലെന മെറ്റ്ലെജ് ഡയബ് അറിയിച്ചു. 2025-ൽ അനുവദിച്ച സ്ഥിരതാമസ അനുമതികളിൽ 8.9 ശതമാനവും ഫ്രഞ്ച് സംസാരിക്കുന്നവർക്കാണ് ലഭിച്ചത്. ഫ്രഞ്ച് ഭാഷാ വൈദഗ്ധ്യമുള്ളവർക്കായി ഏർപ്പെടുത്തിയ പ്രത്യേക ഇമിഗ്രേഷൻ പദ്ധതികളുടെയും പ്രവിശ്യകളുടെ സഹകരണത്തിന്റെയും ഫലമായാണ് ഈ നേട്ടമെന്ന് മന്ത്രി വ്യക്തമാക്കി. 2029-ഓടെ ഈ നിരക്ക് 12 ശതമാനമായി ഉയർത്തുകയാണ് സർക്കാരിന്റെ ലക്ഷ്യം.
കുടിയേറ്റ നയത്തിന്റെ ഭാഗമായി 2026 മുതൽ പ്രവിശ്യകൾക്കും ടെറിട്ടറികൾക്കുമായി 5,000 ഫെഡറൽ സെലക്ഷൻ സ്ഥാനങ്ങൾ കൂടി അധികമായി അനുവദിക്കുമെന്ന് മന്ത്രി പ്രഖ്യാപിച്ചു. നിലവിലുള്ള പ്രൊവിൻഷ്യൽ നോമിനി പ്രോഗ്രാമിന് പുറമെയാണിത്. രാജ്യാന്തര തലത്തിലുള്ള പ്രഗത്ഭരായ ഉദ്യോഗസ്ഥരെ ആകർഷിക്കുന്നതിലൂടെ ഫ്രഞ്ച്, ഇംഗ്ലീഷ് ഭാഷകൾ കൈകാര്യം ചെയ്യുന്ന തൊഴിലാളികളുടെ ക്ഷാമം പരിഹരിക്കാൻ ഈ നീക്കം സഹായിക്കും.
