ഫോർട്ട് മക്മുറേ, ആൽബർട്ട: അമേരിക്കയെ ആശ്രയിക്കുന്നത് കുറയ്ക്കുന്നതിന്റെ ഭാഗമായി, പടിഞ്ഞാറൻ തീരത്തേക്ക് പുതിയ ക്രൂഡ് ഓയിൽ കയറ്റുമതി പൈപ്പ്‌ലൈൻ സ്ഥാപിക്കുന്നതിനുള്ള അനുമതി നടപടികൾ കാനഡ വേഗത്തിലാക്കുമെന്ന് പ്രധാനമന്ത്രി മാർക്ക് കാർണി വ്യാഴാഴ്ച പ്രഖ്യാപിച്ചു. പ്രതിവർഷം 20 ബില്യൺ കനേഡിയൻ ഡോളറിലധികം ($14 ബില്യൺ) ജി.ഡി.പി. സൃഷ്ടിക്കാൻ ലക്ഷ്യമിട്ടുള്ളതാണ് ഈ പദ്ധതി.
കഴിഞ്ഞ ജൂലൈയിൽ പ്രഖ്യാപിച്ച ഈ പൈപ്പ്‌ലൈൻ, അമേരിക്കൻ പ്രസിഡന്റ് ഡൊണാൾഡ് ട്രംപിന്റെ താരിഫുകൾ മൂലമുള്ള ആഘാതം ലഘൂകരിക്കുന്നതിനും യുഎസിനെ മാത്രം ആശ്രയിക്കുന്ന സമ്പദ്‌വ്യവസ്ഥയിൽ മാറ്റം വരുത്തുന്നതിനുമുള്ള കാർണിയുടെ പ്രധാന പദ്ധതിയുടെ ഭാഗമാണ്. പസഫിക് ലിങ്ക് പൈപ്പ്‌ലൈനെ ഔദ്യോഗികമായി ‘ദേശീയ താൽപ്പര്യമുള്ള പദ്ധതിയായി’ ഒട്ടാവ പട്ടികപ്പെടുത്തുമെന്നും, ഒറ്റ ഫെഡറൽ റെഗുലേറ്ററി അവലോകന പ്രക്രിയയിലൂടെ ഇത് മുന്നോട്ട് കൊണ്ടുപോകുമെന്നും കാർണി പറഞ്ഞു. 2027 സെപ്റ്റംബർ 1-നകം ഈ നടപടികൾ പൂർത്തിയാക്കാനാണ് ഒട്ടാവ ലക്ഷ്യമിടുന്നത്.
“പടിഞ്ഞാറൻ തീരത്തേക്കുള്ള പൈപ്പ്‌ലൈൻ നമ്മുടെ സമ്പദ്‌വ്യവസ്ഥയെ പരിവർത്തനം ചെയ്യുന്നതിന്റെയും, അടുത്ത ദശാബ്ദത്തിനുള്ളിൽ യുഎസിന് പുറത്തുള്ള കയറ്റുമതി ഇരട്ടിയാക്കുന്നതിന്റെയും… ലോകത്തിലെ ഒരു പ്രധാന ഊറ്‍ജ ശക്തിയെന്ന നിലയിൽ നമ്മുടെ പൂർണ്ണ ശേഷി പുറത്തെടുക്കുന്നതിന്റെയും ഭാഗമാണ്,” ആൽബർട്ടയിലെ എണ്ണപ്പാട വ്യവസായ കേന്ദ്രമായ ഫോർട്ട് മക്മുറേയിൽ മാധ്യമപ്രവർത്തകരോട് അദ്ദേഹം പറഞ്ഞു.
പ്രതിദിനം 1 ദശലക്ഷം ബാരൽ ശേഷിയുള്ള ഈ പദ്ധതി വഴി 140,000 തൊഴിലവസരങ്ങൾ സൃഷ്ടിക്കപ്പെടുമെന്നും, പ്രതിവർഷം 20 ബില്യൺ കനേഡിയൻ ഡോളറിലധികം ജി.ഡി.പിയും 2060-ഓടെ 100 ബില്യൺ ഡോളർ സർക്കാർ വരുമാനവും ലഭിക്കുമെന്നും ഒട്ടാവ അവകാശപ്പെടുന്നു. നിലവിൽ കാനഡയിൽ കിഴക്ക്-പടിഞ്ഞാറ് ദിശയിൽ പ്രതിദിനം 890,000 ബാരൽ ശേഷിയുള്ള ‘ട്രാൻസ് മൗണ്ടൻ’ പൈപ്പ്‌ലൈൻ മാത്രമാണുള്ളത്. 2024-ൽ ഇതിന്റെ വിപുലീകരണം പൂർത്തിയായെങ്കിലും നിലവിൽ ഇത് പൂർണ്ണ ശേഷിയിലാണ് പ്രവർത്തിക്കുന്നത്.
വർഷങ്ങളായി കാനഡ തങ്ങളുടെ ക്രൂഡ് ഓയിൽ കയറ്റുമതിയുടെ 90 ശതമാനത്തിലധികവും പൈപ്പ്‌ലൈൻ വഴി അമേരിക്കയിലേക്കാണ് അയക്കുന്നത്. പുതിയ എണ്ണ കയറ്റുമതി പൈപ്പ്‌ലൈൻ നിലവിൽ വരുന്നതോടെ ഏഷ്യൻ രാജ്യങ്ങളിലേക്ക് എണ്ണ നൽകുന്ന പ്രധാന ആഗോള വിതരണക്കാരായി കാനഡയ്ക്ക് മാറാൻ കഴിയും. എന്നാൽ പൈപ്പ്‌ലൈൻ നിറയ്ക്കാൻ പുതിയ എണ്ണപ്പാട വിപുലീകരണങ്ങൾ ആവശ്യമാണ്.
സർക്കാർ ഉടമസ്ഥതയിലുള്ള ‘ട്രാൻസ് മൗണ്ടൻ കോർപ്പും’ ‘പെംബിന പൈപ്പ്‌ലൈൻ കോർപ്പും’ ചേർന്ന് കാനഡയുടെ പിന്തുണയോടെയാണ് ഈ പൈപ്പ്‌ലൈൻ നിർമ്മിക്കുന്നത്. ഇതിന് 35.2 ബില്യൺ ഡോളറിനും 43.7 ബില്യൺ ഡോളറിനും ഇടയിൽ ചെലവ് വരുമെന്ന് ആൽബർട്ട കണക്കാക്കുന്നു. ഫെഡറൽ സർക്കാരും ആൽബർട്ട സർക്കാരുമായിരിക്കും പ്രധാന ഉടമകൾ. തദ്ദേശീയ സമൂഹങ്ങൾക്ക് (Indigenous communities) കുറഞ്ഞത് 10 ശതമാനം ഉടമസ്ഥാവകാശം നൽകും.
പരിസ്ഥിതി പ്രവർത്തകരുടെയും തദ്ദേശീയ വിഭാഗങ്ങളുടെയും ശക്തമായ എതിർപ്പുകൾ കാരണം മുൻകാല എണ്ണ പൈപ്പ്‌ലൈൻ പദ്ധതികളിൽ പലതും തടസ്സപ്പെട്ടിരുന്നു. എന്നാൽ ഈ പദ്ധതിക്കായി തദ്ദേശീയ വിഭാഗങ്ങളുമായി “വിപുലമായ” ചർച്ചകൾ നടത്തുമെന്ന് മാർക്ക് കാർണി വ്യക്തമാക്കി.
