ഒട്ടാവ: കാനഡയിൽ സ്ഥിരതാമസം (Permanent Residency) ആഗ്രഹിക്കുന്നവർക്ക് ഏറ്റവും എളുപ്പത്തിൽ ലക്ഷ്യം കാണാൻ സഹായിക്കുന്ന മാർഗ്ഗമായി എക്സ്പ്രസ് എൻട്രിയിലെ ‘കാറ്റഗറി അധിഷ്ഠിത സെലക്ഷൻ’ (CBS) മാറുന്നു. മറ്റ് പ്രോഗ്രാമുകളെ അപേക്ഷിച്ച് കുറഞ്ഞ സി.ആർ.എസ് (CRS) സ്കോർ ഉള്ളവർക്കും ഈ വഴിയിലൂടെ പി.ആർ ലഭിക്കാൻ സാധ്യതയുണ്ടെന്ന് പുതിയ റിപ്പോർട്ടുകൾ വ്യക്തമാക്കുന്നു.

എന്തുകൊണ്ട് ഇത് എളുപ്പമാകുന്നു? സാധാരണ എക്സ്പ്രസ് എൻട്രി ഡ്രോകളിൽ (ഉദാഹരണത്തിന് CEC അല്ലെങ്കിൽ PNP) 500-ന് മുകളിൽ സ്കോർ ഉള്ളവർക്ക് മാത്രം അവസരം ലഭിക്കുമ്പോൾ, കാറ്റഗറി അധിഷ്ഠിത ഡ്രോകളിൽ ഇതിലും കുറഞ്ഞ സ്കോറുള്ളവർക്ക് ക്ഷണം (ITA) ലഭിക്കുന്നുണ്ട്. 2025-ലെ കണക്കുകൾ പ്രകാരം:

ഫ്രഞ്ച് ഭാഷാ പ്രാവീണ്യം: 379–481 സ്കോറുള്ളവർക്കും അവസരം ലഭിച്ചു.
ആരോഗ്യ മേഖല (Healthcare): 462–510 സ്കോർ പരിധിയിൽ ക്ഷണം ലഭിച്ചു.
വിദ്യാഭ്യാസ മേഖല (Education): 462–479 സ്കോർ മതിയായിരുന്നു.

കുറഞ്ഞ പ്രവൃത്തിപരിചയം മതി സാധാരണയായി കാനഡയിൽ ഒരു വർഷത്തെ പ്രവൃത്തിപരിചയം നിർബന്ധമാണെങ്കിലും, കാറ്റഗറി അധിഷ്ഠിത സെലക്ഷനിൽ നിശ്ചിത തൊഴിലുകളിൽ ആറുമാസത്തെ പ്രവൃത്തിപരിചയം (കാനഡയിലോ വിദേശത്തോ ഉള്ളത്) ഉള്ളവർക്കും അപേക്ഷിക്കാൻ സാധിക്കും എന്നതാണ് മറ്റൊരു പ്രത്യേകത.

പ്രധാന കാറ്റഗറികൾ ഏതൊക്കെ? നിലവിൽ ഏഴ് മേഖലകളെയാണ് ഈ പ്രത്യേക പരിഗണനയ്ക്കായി തിരഞ്ഞെടിത്തിട്ടുള്ളത്:

ഫ്രഞ്ച് ഭാഷാ പ്രാവീണ്യം (French-language proficiency)
ആരോഗ്യ മേഖല (Healthcare and social services)
സയൻസ്, ടെക്നോളജി, എഞ്ചിനീയറിംഗ്, മാത്തമാറ്റിക്സ് (STEM)
ട്രേഡ് ജോലികൾ (Trade - പ്ലംബിംഗ്, കൺസ്ട്രക്ഷൻ തുടങ്ങിയവ)
കാർഷിക മേഖല (Agriculture and agri-food)
വിദ്യാഭ്യാസ മേഖല (Education)
കാനഡയിൽ പ്രവൃത്തിപരിചയമുള്ള ഡോക്ടർമാർ (Physicians)

ശ്രദ്ധിക്കേണ്ട കാര്യങ്ങൾ…

ശ്രദ്ധിക്കേണ്ട കാര്യങ്ങൾ ഈ വഴിയിലൂടെ പി.ആർ ലഭിക്കുന്നത് എളുപ്പമാണെങ്കിലും ചില വെല്ലുവിളികളുമുണ്ട്. എല്ലാ വർഷവും എല്ലാ കാറ്റഗറികളിലും ഡ്രോകൾ നടക്കണമെന്നില്ല. ഉദാഹരണത്തിന് 2025-ൽ STEM, അഗ്രികൾച്ചർ മേഖലകളിൽ ഡ്രോകൾ നടന്നില്ല. കൂടാതെ, തൊഴിൽ വിപണിയിലെ മാറ്റങ്ങൾക്കനുസരിച്ച് കാറ്റഗറികളിലും യോഗ്യതകളിലും മാറ്റം വരുത്താൻ സർക്കാരിന് അധികാരമുണ്ട്. കാനഡ പി.ആർ കാത്തിരിക്കുന്ന മലയാളികൾ ഉൾപ്പെടെയുള്ള ഉദ്യോഗാർത്ഥികൾക്ക് തങ്ങളുടെ തൊഴിൽ മേഖല ഈ കാറ്റഗറിയിൽ ഉൾപ്പെടുന്നുണ്ടോ എന്ന് പരിശോധിച്ച് തയ്യാറെടുപ്പുകൾ നടത്തുന്നത് ഗുണകരമാകും.