കാൽഗറി നഗരത്തിൽ പരസ്യമായ മയക്കുമരുന്ന് ഉപയോഗം അവസാനിപ്പിക്കാനുള്ള പൈലറ്റ് പദ്ധതി വേഗത്തിലാക്കാനൊരുങ്ങി മേയർ ജ്യോതി ഗോണ്ടെക്. ഇതുമായി ബന്ധപ്പെട്ട് പൊതുസുരക്ഷയെക്കുറിച്ചുള്ള പ്രമേയത്തിൽ ഭേദഗതി അവതരിപ്പിക്കുമെന്ന് മേയർ അറിയിച്ചു. നഗരത്തിലെ തെരുവുകളും പൊതുഗതാഗതവും സുരക്ഷിതമാക്കാൻ ഇത് സഹായിക്കുമെന്നും മേയർ പറയുന്നു.
അധികാരികൾക്ക് മയക്കുമരുന്ന് പിടിച്ചെടുക്കാനും നീക്കം ചെയ്യാനുമുള്ള അധികാരം നൽകുന്ന നിയമപരമായ മാറ്റങ്ങളെക്കുറിച്ച് പഠിക്കാനും, മറ്റ് കനേഡിയൻ നഗരങ്ങളിലെ സമാന സമീപനങ്ങൾ വിശകലനം ചെയ്യാനും മേയർ നിർദ്ദേശിച്ചു. ഈ നിയമലംഘനങ്ങൾ കൈകാര്യം ചെയ്യാനും കുറ്റവാളികളെ സഹായിക്കാനുമായി നിലവിലുള്ള കമ്മ്യൂണിറ്റി കോർട്ട് വിപുലീകരിക്കാനും ധനസഹായം നൽകാനും ബജറ്റ് നിർദ്ദേശം സമർപ്പിക്കും. പൊതു ഇടങ്ങളിൽ സുരക്ഷ പുനഃസ്ഥാപിച്ച്, സ്ഥിരമായ പരിഹാരം കണ്ടെത്താനാണ് ലക്ഷ്യമിടുന്നതെന്നും അവർ കൂട്ടിച്ചേർത്തു.
