ലോകത്ത് ജീവിക്കാൻ ഏറ്റവും മികച്ച നഗരങ്ങളുടെ പട്ടികയിൽ അഞ്ചാം സ്ഥാനം നേടി കാൽഗറി. ദി ഇക്കണോമിസ്റ്റ് പുറത്തുവിട്ട പുതിയ റാങ്കിംഗ് അനുസരിച്ചാണ് ഈ നേട്ടം. വടക്കേ അമേരിക്കൻ നഗരങ്ങളിൽ കാൽഗറിയാണ് ഒന്നാമത്. മികച്ച വിദ്യാഭ്യാസം, ആരോഗ്യം, സ്ഥിരത, അടിസ്ഥാന സൗകര്യങ്ങൾ എന്നിവയിലെല്ലാം കാൽഗറിക്ക് 100-ൽ 100 മാർക്ക് ലഭിച്ചു.

കഴിഞ്ഞ വർഷം ഏഴാം സ്ഥാനത്തായിരുന്ന കാൽഗറി, ഇപ്പോൾ ജനീവയ്‌ക്കൊപ്പമാണ് അഞ്ചാം സ്ഥാനം പങ്കിടുന്നത്. കാനഡയിലെ മറ്റ് പ്രധാന നഗരങ്ങളായ വാൻകൂവർ ഏഴാമതും ടൊറൻ്റോ 12-ാമതും എത്തി. ഉയർന്ന ജീവിതനിലവാരം നിലനിർത്തിക്കൊണ്ട് മറ്റ് നഗരങ്ങളെ പിന്നിലാക്കാൻ കാൽഗറിക്ക് സാധിച്ചു. ശക്തമായ സമ്പദ്‌വ്യവസ്ഥ, ഉയർന്ന ജീവിത നിലവാരം, മികച്ച തൊഴിലവസരങ്ങൾ എന്നിവയാണ് കാൽഗറിയെ ശ്രദ്ധേയമാക്കിയത്.

നഗരത്തിലെ ശുദ്ധമായ പരിസ്ഥിതിയെക്കുറിച്ചും റിപ്പോർട്ടിൽ എടുത്തു പറഞ്ഞിട്ടുണ്ട്. മികച്ച സ്കൂളുകളും ആരോഗ്യ പരിരക്ഷ ഉൾപ്പെടെയുള്ള മികച്ച പൊതു സേവനങ്ങളും കാൽഗറിയുടെ മറ്റ് നേട്ടങ്ങളാണ്. കുറഞ്ഞ കുറ്റകൃത്യ നിരക്ക് കുടുംബങ്ങൾക്ക് താമസിക്കാനും ജോലി ചെയ്യാനും സുരക്ഷിതമായ ഒരിടമാക്കി കാൽഗറിയെ മാറ്റുന്നതായും റിപ്പോർട്ട് ചൂണ്ടിക്കാട്ടി.