ക്യാബിൻ ക്രൂ അംഗങ്ങൾ പണിമുടക്കുന്ന സാഹചര്യത്തിൽ യാത്രക്കാർക്ക് ടിക്കറ്റുകളിൽ സൗജന്യമായി മാറ്റങ്ങൾ വരുത്താനും റദ്ദാക്കാനും അവസരം നൽകി വെസ്റ്റ്‌ജെറ്റ് എയർലൈൻ. ജൂലൈ 30-നും ഓഗസ്റ്റ് 4-നും ഇടയിൽ യാത്ര നിശ്ചയിച്ചിട്ടുള്ളവർക്ക് ഇളവ് പ്രയോജനപ്പെടുത്താം. ശമ്പള വർധന അടക്കമുള്ള ആവശ്യങ്ങൾ ഉന്നയിച്ച് 4,400-ഓളം വരുന്ന ക്യാബിൻ ക്രൂ അംഗങ്ങൾ പണിമുടക്കിന് അനുകൂലമായി വോട്ട് ചെയ്തിരുന്നു. ഓഗസ്റ്റ് രണ്ട് മുതൽ ജീവനക്കാർക്ക് നിയമപരമായി സമരം ആരംഭിക്കാൻ സാധിക്കും. ഇതോടെ ഓഗസ്റ്റിലെ നീണ്ട അവധിക്കാലത്തെ യാത്രകളെ സാരമായി ബാധിച്ചേക്കുമെന്ന ആശങ്കയിലാണ് കാൽഗറി ആസ്ഥാനമായ എയർലൈൻ.

അതേസമയം പണിമുടക്ക് ഒഴിവാക്കാൻ ജീവനക്കാരുടെ യൂണിയനുമായി ചർച്ച പുരോഗമിക്കുകയാണെന്ന് വെസ്റ്റ്‌ജെറ്റ് വക്താവ് അറിയിച്ചു. ഇരുപക്ഷവും പണിമുടക്ക് ഒഴിവാക്കാൻ ചർച്ചകൾ ആരംഭിച്ചതായി യൂണിയൻ വക്താവ് ആലിയ ഹുസൈൻ പറഞ്ഞു. പതിനായിരക്കണക്കിന് യാത്രക്കാരെ വലച്ച് 2024 വേനൽക്കാലത്ത് വെസ്റ്റ്‌ജെറ്റ് ജീവനക്കാർ പണിമുടക്കിയിരുന്നു.