ഓട്ടവ: കാനഡയെ ഒരു തരത്തിലും അമേരിക്കയുടെ ഭാഗമാകാൻ അനുവദിക്കില്ലെന്ന് മാർക്ക് കാർണി. കാനഡയുടെ പുതിയ പ്രധാനമന്ത്രിയായി തിരഞ്ഞെടുത്തതിന് ശേഷം നടത്തിയ പ്രസംഗത്തിലാണ്, കാനഡയെ അമേരിക്കയുടെ 51-ാമത്തെ സംസ്ഥാനമാക്കാമെന്ന ട്രംപിന്റെ ആഹ്വാനത്തിനെതിരെ മാർക്ക് കാർണി ശക്തമായി പ്രതികരിച്ചത്.
‘അമേരിക്ക കാനഡയല്ല. കാനഡ ഒരിക്കലും, ഒരു തരത്തിലും അമേരിക്കയുടെ ഭാഗമാകില്ല, കാർണി പറഞ്ഞു. അമേരിക്കക്കാർക്ക് നമ്മുടെ വിഭവങ്ങൾ, വെളളം, ഭൂമി എല്ലാം വേണം. അവർ അത് സ്വന്തമാക്കിയാൽ നമ്മുടെ ജീവിതരീതി തന്നെ നശിപ്പിക്കുമെന്നും, കാർണി പറഞ്ഞു. അതേസമയം പാർട്ടിയെ പുനരുജ്ജീവിപ്പിക്കാനും യുഎസ് പ്രസിഡന്റ് ഡോണൾഡ് ട്രംപുമായുള്ള വ്യാപാര ചർച്ചകൾക്ക് നേതൃത്വം നൽകാനും തനിക്ക് സാധിക്കുമെന്ന് കാർണി പറഞ്ഞു.
കാനഡയുടെ ഇരുപത്തിനാലാമത് പ്രധാനമന്ത്രിയാണ് മാർക്ക് കാർണി. രാഷ്ട്രീയത്തിൽ തുടക്കക്കാരനായ കാർണി ബാങ്ക് ഓഫ് ഇംഗ്ലണ്ടിന്റെയും, ബാങ്ക് ഓഫ് കാനഡയുടേയും മുൻ ഗവർണർ ആയിരുന്നു. രാഷ്ട്രീയ പശ്ചാത്തലമില്ലാത്ത ഒരാൾ കാനഡയുടെ പ്രധാനമന്ത്രിയാകുന്നത് ഇതാദ്യമായാണ്.
