ഒൻ്റാരിയോ പീൽ മേഖലയിൽ നിന്നും കാണാതായ ഒരു വയസ്സുള്ള പെൺകുട്ടിയെ സുരക്ഷിതമായി കണ്ടെത്തിയതായി പീൽ പൊലീസ്. കുട്ടിയെ കാണാതായതോടെ പ്രവിശ്യയിൽ ആംബർ അലർട്ട് പ്രഖ്യാപിച്ചിരുന്നു. ചൊവ്വാഴ്ച ഉച്ചകഴിഞ്ഞ് രണ്ടു മണിയോടെ ക്യൂൻ സ്ട്രീറ്റ് ഈസ്റ്റിനും എയർപോർട്ട് റോഡിനും സമീപമുള്ള സ്ട്രിപ്പ് മാളിന്റെ പാർക്കിങ് സ്ഥലത്ത് യുവതിയെ വെടിവെച്ചു കൊലപ്പെടുത്തിയ ശേഷം കുട്ടിയുമായി പ്രതി കടന്നുകളയുകയായിരുന്നു. 38 വയസ്സുള്ള ആന്റണി ഡെഷെപ്പർ ആണ് പ്രതി. കറുത്ത നിറത്തിലുള്ള, 2024 മോഡൽ നിസ്സാൻ കിക്ക് (ക്യൂബെക് ലൈസൻസ് പ്ലേറ്റ്: FRV4520) കാറിൽ രക്ഷപ്പെടുമ്പോൾ ഇയാളുടെ ഒരു വയസ്സുള്ള മകൾ കാറിന്റെ പിൻ സീറ്റിലുണ്ടായിരുന്നു. വൈകുന്നേരം 5 മണിയോടെയാണ് ആംബർ അലർട്ട് പുറപ്പെടുവിച്ചത്. വൈകുന്നേരം 6:40 ഓടെ കുട്ടിയെ സുരക്ഷിതമായി കണ്ടെത്തിയതായും കുടുംബാംഗങ്ങളെ ഏൽപ്പിച്ചതായും പൊലീസ് സ്ഥിരീകരിച്ചു. പ്രതി ആന്റണി ഡെഷെപ്പറും കൊല്ലപ്പെട്ട യുവതിയും തമ്മിലുള്ള ബന്ധം വ്യക്തമല്ല.
