അടുത്ത പത്ത് വർഷത്തിനുള്ളിൽ ബ്രിട്ടീഷ് കൊളംബിയയെ പിന്നിലാക്കി കാനഡയിലെ ഏറ്റവും ജനസംഖ്യയുള്ള മൂന്നാമത്തെ പ്രവിശ്യയായി ആൽബർട്ട മാറുമെന്ന് സ്റ്റാറ്റിസ്റ്റിക്സ് കാനഡയുടെ പുതിയ പഠന റിപ്പോർട്ട്. ആൽബർട്ടയിലെ ഉയർന്ന പ്രജനന നിരക്കും താരതമ്യേന പ്രായം കുറഞ്ഞ ജനവിഭാഗവുമാണ് ഈ ജനസംഖ്യാ കുതിപ്പിന് കാരണമായി ചൂണ്ടിക്കാണിക്കപ്പെടുന്നത്. നിലവിലെ സാഹചര്യങ്ങൾ തുടരുകയാണെങ്കിൽ 2036-ഓടെ ആൽബർട്ടയിലെ ജനസംഖ്യ ബി.സി-യെ മറികടക്കുമെന്നും, 2050-ഓടെ ഇത് ഏഴ് മില്യണിൽ (70 ലക്ഷം) എത്തുമെന്നുമാണ് പ്രവചനം.
ബി.സി-യിൽ വാർദ്ധക്യസഹജമായ മരണനിരക്ക് വർദ്ധിക്കുന്നതും, ആൽബർട്ടയിൽ ജനനനിരക്ക് ഉയർന്നുനിൽക്കുന്നതും ഈ രണ്ട് പ്രവിശ്യകൾ തമ്മിലുള്ള ജനസംഖ്യാ വ്യത്യാസം കുറയ്ക്കാൻ കാരണമാകുന്നുണ്ട്. ജീവിതച്ചെലവ് കുറഞ്ഞ ആൽബർട്ടയിലേക്ക് ഉന്നത വിദ്യാഭ്യാസമുള്ള യുവത വൻതോതിൽ കുടിയേറുന്നത് ബ്രിട്ടീഷ് കൊളംബിയയുടെ സാമ്പത്തിക മേഖലയിൽ ആശങ്കയുണ്ടാക്കുന്നുണ്ട്. യുവ തൊഴിലാളികളുടെ കുറവ് നികുതി വരുമാനത്തെയും സേവന മേഖലയെയും ബാധിക്കുമെന്ന് സാമ്പത്തിക വിദഗ്ധർ മുന്നറിയിപ്പ് നൽകുന്നു.
അതേസമയം, ഫെഡറൽ ഗവൺമെൻ്റ് ഇമിഗ്രേഷൻ പരിധി വെട്ടിക്കുറയ്ക്കുന്നത് ആരോഗ്യമേഖലയിലും സാങ്കേതിക മേഖലയിലും ആവശ്യമായ വിദഗ്ധരെ നിയമിക്കുന്നതിന് തടസ്സമാകുന്നുവെന്ന് ബി.സി പ്രീമിയർ ഡേവിഡ് ഈബി ആരോപിച്ചു. പ്രവിശ്യയുടെ സാമ്പത്തിക വളർച്ച സുഗമമാക്കാൻ ഇമിഗ്രേഷൻ നയങ്ങളിൽ വ്യക്തത വരുത്തണമെന്ന ആവശ്യം ഫെഡറൽ കൗൺസിലിൽ ഉന്നയിക്കാനാണ് ബി.സി സർക്കാരിൻ്റെ തീരുമാനം.
