പ്രവിശ്യാ ഹെൽത്ത് കാർഡുകളുടെ വിവരങ്ങൾ പുതുക്കാനെന്ന വ്യാജേന മൊബൈൽ ഫോണുകളിലേക്ക് എത്തുന്ന വ്യാജ ടെക്സ്റ്റ് സന്ദേശങ്ങൾക്കെതിരെ ആൽബർട്ട സർക്കാർ മുന്നറിയിപ്പ് നൽകി. ഇത്തരം സന്ദേശങ്ങൾ തട്ടിപ്പാണെന്നും അവ അവഗണിക്കണമെന്നും അധികൃതർ നിർദ്ദേശിച്ചു. 2023 ജനുവരിക്ക് മുമ്പ് നൽകിയ എല്ലാ പ്രവിശ്യാ ഹെൽത്ത് കാർഡുകളുടെയും കാലാവധി കഴിഞ്ഞുവെന്നും അവ നിർബന്ധമായും മാറ്റേണ്ടതുണ്ടെന്നുമാണ് ഈ സന്ദേശങ്ങളിൽ പറയുന്നത്.
ഫാർമസികളിൽ നിന്നും ഹെൽത്ത് ക്ലിനിക്കുകളിൽ നിന്നുമുള്ള ചില ആരോഗ്യ സേവനങ്ങൾ തുടർന്നും ലഭിക്കുന്നതിനായി സന്ദേശത്തോടൊപ്പമുള്ള ലിങ്കിൽ കയറി വിവരങ്ങൾ അപ്‌ഡേറ്റ് ചെയ്യാൻ ഇതിൽ ആവശ്യപ്പെടുന്നുണ്ട്. എന്നാൽ ആൽബർട്ട സർക്കാർ ഒരിക്കലും വ്യക്തിഗത വിവരങ്ങളോ സാമ്പത്തിക വിവരങ്ങളോ ആവശ്യപ്പെട്ട് ഇത്തരം സന്ദേശങ്ങൾ അയക്കാറില്ലെന്ന് സർവീസ് ആൽബർട്ട പുറത്തിറക്കിയ പ്രസ്താവനയിൽ വ്യക്തമാക്കി. ബെറ്റർ ബിസിനസ് ബ്യൂറോയും ഈ തട്ടിപ്പിനെതിരെ ജാഗ്രതാ നിർദ്ദേശം നൽകിയിട്ടുണ്ട്. പേപ്പർ ഹെൽത്ത് കാർഡുകൾ ഒഴിവാക്കി പകരം ഡ്രൈവിംഗ് ലൈസൻസിലേക്ക് ഹെൽത്ത് നമ്പറുകൾ ചേർക്കാനുള്ള ആൽബർട്ട സർക്കാരിൻ്റെ പുതിയ പദ്ധതിയെക്കുറിച്ചുള്ള ജനങ്ങളുടെ ആശയക്കുഴപ്പം മുതലെടുക്കാനാണ് തട്ടിപ്പുകാർ ഇപ്പോൾ ശ്രമിക്കുന്നത്.
ഇത്തരം സന്ദേശങ്ങൾ ലഭിച്ചാൽ ലിങ്കുകളിൽ ക്ലിക്ക് ചെയ്യരുതെന്നും, കൂടുതൽ വിവരങ്ങൾ അറിയാൻ ഔദ്യോഗിക സംവിധാനങ്ങൾ വഴി നേരിട്ട് പരിശോധിക്കുകയാണ് വേണ്ടതെന്നും അധികൃതർ പറയുന്നു. ജനങ്ങളുടെ വ്യക്തിഗത വിവരങ്ങളും പണവും തട്ടിയെടുക്കുക എന്ന ലക്ഷ്യത്തോടെയാണ് ഈ ‘ഫ്രോഡ്സ്റ്ററുകൾ’ പ്രവർത്തിക്കുന്നതെന്നും അതിനാൽ ഇത്തരം അനാവശ്യ സന്ദേശങ്ങളോട് പ്രതികരിക്കുകയോ ലിങ്കുകൾ തുറക്കുകയോ ചെയ്യരുതെന്നും അധികൃതർ നിർദ്ദേശിക്കുന്നു.
