ആൽബെർട്ട: ആൽബെർട്ടയിൽ നിയമപരമായ മാനദണ്ഡങ്ങൾ പാലിക്കാതെ പ്രവർത്തിക്കുന്ന ട്രക്ക് കമ്പനികൾക്കും ഡ്രൈവിങ് സ്കൂളുകൾക്കും എതിരെ ശക്തമായ നടപടി സ്വീകരിക്കുമെന്ന് പ്രവിശ്യാ സർക്കാർ. വാഹനങ്ങൾക്കും പരിശീലന സ്കൂളുകൾക്കുമുള്ള മേൽനോട്ടം വർദ്ധിപ്പിക്കുന്നതിനായി പരിശോധനകളും ഓഡിറ്റുകളും അന്വേഷണങ്ങളും കൂട്ടാനാണ് തീരുമാനം.
മോശം ഡ്രൈവിംഗ്, സുരക്ഷിതമല്ലാത്ത ഉപകരണങ്ങൾ ഉപയോഗിക്കൽ, സുരക്ഷാ മാനദണ്ഡങ്ങൾ പാലിക്കുന്നതിലുള്ള വീഴ്ച തുടങ്ങിയ കാരണങ്ങളാൽ ഇതിനോടകം 13 ട്രക്കിംഗ് കമ്പനികളെ റോഡിൽ നിന്ന് ഒഴിവാക്കിയിട്ടുണ്ട് എന്ന് ആൽബെർട്ട ഗതാഗത മന്ത്രി ഡെവിൻ ഡ്രീസെൻ പറഞ്ഞു. ഇത്തരം കമ്പനികളിൽ നിന്ന് $100,000 ഡോളറിലധികം പിഴ ഈടാക്കുകയും, അഞ്ച് ഡ്രൈവിംഗ് പരിശീലന സ്കൂളുകൾ അടച്ചുപൂട്ടാൻ ഉത്തരവിടുകയും, 12 ലൈസൻസുകൾ റദ്ദാക്കുകയും ചെയ്തിട്ടുണ്ട്.
നിയമപരമായ മേൽനോട്ടം ഒഴിവാക്കാൻ പേര് മാറ്റുകയോ സ്ഥലം മാറ്റുകയോ ചെയ്യുന്ന “ചാമെലിയോൺ കാരിയേഴ്സ്” എന്ന കമ്പനികളെ നേരിടാൻ ആൽബെർട്ട സർക്കാർ ഫെഡറൽ പങ്കാളികളുമായി ചേർന്ന് പ്രവർത്തിക്കും. ട്രക്കിംഗ് വ്യവസായത്തിൽ സുരക്ഷയും വിശ്വാസ്യതയും ഉറപ്പാക്കുക, ഒപ്പം നിയമലംഘകരെ വേഗത്തിൽ തിരിച്ചറിയുകയും അവരെ ഒഴിവാക്കുകയും ചെയ്യുക എന്ന ലക്ഷ്യത്തോടെയാണ് ഈ കൂട്ടായ നീക്കം. ഉത്തരവാദിത്തമില്ലായ്മയ്ക്ക് അവസാനമിട്ട് സുരക്ഷാ നിലവാരം മെച്ചപ്പെടുത്താനാണ് സർക്കാർ ശ്രമിക്കുന്നത്.
