എഡ്മണ്ടൻ : ആല്‍ബര്‍ട്ടയിലുടനീളം ഫെബ്രുവരിയില്‍ കാലാവസ്ഥയ്ക്ക് വലിയ മാറ്റം ഉണ്ടാകുമെന്ന് കാലാവസ്ഥ നിരീക്ഷകർ. വരും മാസത്തില്‍ കഠിനമായ തണുപ്പും കനത്ത മഞ്ഞുവീഴ്ചയുമായിരിക്കും ആല്‍ബര്‍ട്ടയില്‍ അനുഭവപ്പെടുകയെന്ന് എണ്‍വയോണ്‍മെന്റ് കാനഡ പ്രവചിക്കുന്നു. വാരാന്ത്യത്തോടെ കാലാവസ്ഥയിൽ വ്യതിയാനമുണ്ടാകുമെന്നാണ് മുന്നറിയിപ്പ്.
അടുത്തയാഴ്ച ആദ്യ ദിവസങ്ങളില്‍ താപനില കുത്തനെ കുറയുമെന്നും തിങ്കള്‍, ചൊവ്വ ദിവസങ്ങളായിരിക്കും ഏറ്റവും തണുപ്പുള്ള ദിവസങ്ങളെന്നും ഏജന്‍സി പ്രവചിക്കുന്നു. ഫെബ്രുവരിയിലുടനീളം കഠിനമായ തണുപ്പ് നീണ്ടുനില്‍ക്കുമെന്നാണ് പ്രതീക്ഷിക്കുന്നത്. പ്രവിശ്യയിലെ മിക്ക പ്രദേശങ്ങളിലും താപനില ശരാശരിയേക്കാള്‍ 3 ഡിഗ്രി സെല്‍ഷ്യസ് മുതല്‍ 5 ഡിഗ്രി സെല്‍ഷ്യസ് വരെ കുറവായിരിക്കുമെന്നും എണ്‍വയോണ്‍മെന്റ് കാനഡ പറയുന്നു.
