ആൽബർട്ടയിലെ നഴ്സുമാരും കവനൻ്റ് ഹെൽത്തും (Covenant Health) തമ്മിലുള്ള പുതിയ കരാർ അംഗീകരിച്ചതായി ആൽബർട്ട യൂണിയൻ ഓഫ് പബ്ലിക് എംപ്ലോയീസ് (AUPE) അറിയിച്ചു. പ്രവിശ്യയിലെ ആയിരക്കണക്കിന് ആരോഗ്യപ്രവർത്തകരുടെ വേതനത്തിലും ജോലി സാഹചര്യങ്ങളിലും പുതിയ കരാർ മാറ്റം വരുത്തുമെന്ന് യൂണിയൻ വ്യക്തമാക്കി. 2024 ഏപ്രിൽ 1 മുതൽ മുൻകാല പ്രാബല്യമുള്ള ഈ കരാർ 2028 മാർച്ച് 31 വരെ തുടരും. പുതിയ കരാർ അംഗീകരിക്കുന്നതിനായി യൂണിയൻ അംഗങ്ങളിൽ 69.8 ശതമാനം പേർ വോട്ട് രേഖപ്പെടുത്തി.
കരാർ പ്രകാരം നഴ്സിംഗ് പരിചരണ വിഭാഗത്തിലെ ജീവനക്കാർക്ക് നാല് വർഷത്തേക്ക് 12 ശതമാനം ശമ്പള വർധന ലഭിക്കും. ലൈസൻസുള്ള പ്രാക്ടിക്കൽ നഴ്സുമാർക്ക് (LPN) പത്ത് ശതമാനം മാർക്കറ്റ് അഡ്ജസ്റ്റ്മെന്റ് വേതനവും അനുവദിക്കും. ഇതിന് പുറമെ സർട്ടിഫൈഡ്, അൺസർട്ടിഫൈഡ് ഹെൽത്ത് കെയർ എയിഡുകൾക്ക് നാല് ശതമാനം വേതന വർധനവിനും കരാറിൽ വ്യവസ്ഥയുണ്ടെന്ന് AUPE പ്രസിഡന്റ് സാന്ദ്ര അസോക്കർ അറിയിച്ചു.
