ആഗോള കത്തോലിക്കാ സഭയുടെ മാര്പാപ്പയായി ലിയോ പതിനാലാമന് സ്ഥാനമേറ്റു. മുക്കുവന്റെ മോതിരവും പാലിയവും സ്വീകരിച്ചുകൊണ്ടാണ് സ്ഥാനമേറ്റെടുത്തത്. സമാധാനം പുലരുന്ന പുതിയ ലോകം സാധ്യമാകണമെന്ന് സ്ഥാനമേറ്റ ചടങ്ങില് മാര്പാപ്പ പറഞ്ഞു. രണ്ടു മണിക്കൂറോളം നീണ്ടു നിന്ന ചടങ്ങുകള്ക്കൊടുവിലാണ് ലിയോ പതിനാലാമന് മാര്പാപ്പയായി സ്ഥാനമേറ്റത്. സെന്റ് പീറ്റേഴ്സ് ചത്വരത്തിലെ പ്രധാന വേദിയിലാണ് ചടങ്ങുകള് നടന്നത്. ലിയോ പതിനാലാമന് മാര്പാപ്പയുടെ കാര്മികത്വത്തിലാണ് സെന്റ് പീറ്റേഴ്സ് ചത്വരത്തില് കുര്ബാന നടന്നത്. കുര്ബാനമധ്യേ വലിയ ഇടയന്റെ വസ്ത്രവും സ്ഥാനമോതിരവും മാര്പാപ്പ ഏറ്റുവാങ്ങി. കുര്ബാനയ്ക്കൊടുവില് പത്രോസിന്റെ പിന്ഗാമിയായി മാര്പാപ്പ സഭയുടെ സാരഥ്യം ഏറ്റെടുത്തു. കത്തോലിക്ക സഭയുടെ 267ാം മാര്പാപ്പയായാണ് ലിയോ പതിനാലാമന് ചുമതലയേല്ക്കുന്നത്.
ചടങ്ങുകള് ആരംഭിക്കുന്നതിന് മുമ്പായി തുറന്ന വാഹനത്തിലെത്തി സെന്റ് പീറ്റേഴ്സ് ചത്വരത്തില് ഒത്തുചേര്ന്ന വിശ്വാസികളെ ആശിര്വദിച്ചു. സെന്റ് പീറ്റേഴ്സ് ബസലിക്കയില് കുര്ബാനയ്ക്കുശേഷം വിശ്വാസികളെ അഭിസംബോധന ചെയ്തു. സ്ഥാനാരോഹണ ചടങ്ങിന് സാക്ഷ്യം വഹിക്കാന് ലോകനേതാക്കള് വത്തിക്കാനിലെത്തിയിട്ടുണ്ട്.
