ഓട്ടവ: ഈസ്റ്റേൺ ഒൻ്റാരിയോയിൽ കഴിഞ്ഞ വർഷം 72 വാഹനാപകടങ്ങളിലായി 81 പേർ മരിച്ചതായി ഒപിപി. അമിത വേഗം കാരണം 26 അപകടങ്ങൾ ഉണ്ടായപ്പോൾ അശ്രദ്ധമായ ഡ്രൈവിങ് കാരണം 16 അപകടങ്ങളും മദ്യം-മയക്കുമരുന്ന് ഉപയോഗം മൂലം 12 അപകടങ്ങളും ഉണ്ടായതായി പ്രവിശ്യാ പൊലീസ് അറിയിച്ചു. കൂടാതെ യാത്രക്കാർ സീറ്റ് ബെൽറ്റ് ധരിക്കാത്തതിനാൽ 10 അപകടങ്ങളും സംഭവിച്ചതായി ഒപിപി റിപ്പോർട്ട് ചെയ്തു. അതേസമയം 2025-ൽ ഇതുവരെ 11 വാഹനാപകടങ്ങൾ ഉണ്ടായി, അതിൽ 13 പേർക്ക് ജീവൻ നഷ്ടപ്പെട്ടു.
കനേഡിയൻ ഓട്ടോമൊബൈൽ അസോസിയേഷൻ നടത്തിയ പഠനത്തിൽ, അഞ്ചിൽ ഒരാൾ, പതിവായി വാഹനമോടിക്കുന്നത് അമിത വേഗത്തിലാണെന്ന് പറയുന്നു. റോഡുകളും ഹൈവേകളും സുരക്ഷിതമാക്കുന്നതിന്റെ ഭാഗമാകാൻ എല്ലാ ഡ്രൈവർമാരോടും ഉദ്യോഗസ്ഥർ ആഹ്വാനം ചെയ്യുന്നതായി OPP എക്സിൽ കുറിച്ചു.
വാഹനമോടിക്കുമ്പോൾ വേഗം കുറയ്ക്കാനും, ഒരിക്കലും അലസമായി വാഹനമോടിക്കരുതെന്നും, മുന്നിലുള്ള റോഡിൽ ശ്രദ്ധ കേന്ദ്രീകരിക്കണമെന്നും, എപ്പോഴും സീറ്റ് ബെൽറ്റുകൾ ധരിക്കണമെന്നും പ്രവിശ്യാ പൊലീസ് സേന ഡ്രൈവർമാർക്ക് നിർദേശം നൽകി. അപകടകരമായ രീതിയിൽ ആരെങ്കിലും വാഹനമോടിക്കുന്നത് കണ്ടാൽ ഉടൻ തന്നെ 9-1-1 എന്ന നമ്പറിൽ ബന്ധപ്പെടണമെന്ന് ഒപിപി അഭ്യർത്ഥിച്ചു.
