എഡ്മണ്ടൻ, അൽബെർട്ട — കാനഡയുടെ പരമാധികാരത്തിന് ഭീഷണികൾ ഉയരുന്ന ഈ ഘട്ടത്തിൽ, വേർപിരിയൽ ആവശ്യപ്പെടുന്ന റെഫറണ്ടം (ജനഹിതപരിശോധന) വലിയൊരു അപകടസാധ്യതയാണെന്ന് മുന്നറിയിപ്പ് നൽകിക്കൊണ്ട് സ്വന്തം നാടായ അൽബെർട്ടയിലെ വോട്ടർമാർക്ക് മുൻപിൽ അവസാന അഭ്യർത്ഥനയുമായി കാനഡ പ്രധാനമന്ത്രി മാർക്ക് കാർണി.
അമേരിക്കൻ പ്രസിഡന്റ് ഡോണാൾഡ് ട്രംപ് വ്യാപാര യുദ്ധം ശക്തമാക്കുകയും കാനഡയെ അമേരിക്കയുടെ 51-ാമത് സംസ്ഥാനമാക്കുമെന്ന് ഭീഷണിപ്പെടുത്തുകയും ചെയ്യുന്ന സാഹചര്യത്തിൽ, ഈ റെഫറണ്ടം “ഏറ്റവും മോശമായ സമയത്താണ്” വന്നെത്തിയിരിക്കുന്നതെന്ന് കാർണി മുന്നറിയിപ്പ് നൽകി. ഇതിന്റെ അനന്തരഫലങ്ങളെ നിസ്സാരമായി കാണരുതെന്ന് അദ്ദേഹം അൽബെർട്ടയിലെ ജനങ്ങളോട് അഭ്യർത്ഥിച്ചു.
“ഇതിന്റെ കാര്യത്തിൽ തീരുമാനം എടുത്തുകഴിഞ്ഞു എന്ന് ആരും നിങ്ങളോട് പറയേണ്ടതില്ല. ജന പങ്കാളിത്തമായിരിക്കും ഇതിന്റെ ഫലം തീരുമാനിക്കുക,” താൻ വളർന്ന എഡ്മണ്ടനിൽ സംഘടിപ്പിച്ച അനുകൂല കാനഡ റാലിയെ അഭിസംബോധന ചെയ്തുകൊണ്ട് കാർണി പറഞ്ഞു.
“ഇതൊരു കളിയല്ല, പോക്കർ കളിയുമല്ല. കാനഡയ്‌ക്കെതിരെയുള്ള വോട്ട് വലിയ അപകടത്തിലേക്ക് നയിക്കുന്ന ഒന്നാണ്; അത് അൽബെർട്ടക്കാർക്കും കനേഡിയൻമാർക്കും വരും വർഷങ്ങളിൽ വലിയ അനിശ്ചിതത്വവും നിരവധി അവസര നഷ്ടങ്ങളുമായിരിക്കും നൽകുക,” അദ്ദേഹം കൂട്ടിച്ചേർത്തു.
തിങ്കളാഴ്ച നടക്കുന്ന വോട്ടെടുപ്പ് സ്വാതന്ത്ര്യത്തിനായുള്ള ഒരു നേരിട്ടുള്ള റെഫറണ്ടമല്ല. ലോകത്തിലെ ഏറ്റവും വലിയ നാലാമത്തെ എണ്ണ ശേഖരമുള്ള കാനഡയിലെ അൽബെർട്ട, ഒരു കനേഡിയൻ പ്രവിശ്യയായി തുടരണമോ അതോ വേർപിരിയുന്നതിനായുള്ള ഭാവി റെഫറണ്ടത്തിലേക്ക് കടക്കാൻ സർക്കാരിന് നിയമപരമായ നിർദ്ദേശം നൽകണമോ എന്നാണ് ഇവിടെ തീരുമാനിക്കുന്നത്.
