അമേരിക്കയിലെ മലയാളി വോളീബോൾ ചരിത്രത്തിൽ പുതിയ ചരിത്രമെഴുതി കലിഫോർണിയ ബ്ല്ലാസ്റ്റേഴ്സ് വോളീബോൾ ക്ലബ് (CBVC). ഒരേ വർഷത്തിൽ തന്നെ ജിമ്മി ജോർജ് മെമ്മോറിയൽ വോളീബോൾ ചാമ്പ്യൻഷിപ്പും ലൂക്കച്ചൻ മെമ്മോറിയൽ ചാമ്പ്യൻഷിപ്പും സ്വന്തമാക്കിയാണ് ക്ലബ് ഈ അപൂർവ നേട്ടം കൈവരിച്ചത്. 2026ലെ 36-ാം ജിമ്മി ജോർജ് ട്രോഫിയിലെ സൂപ്പർ ട്രോഫി 40+ മാസ്റ്റേഴ്സ് വിഭാഗത്തിൽ നയാഗ്രയെയും ഫൈനലിൽ ഹ്യൂസ്റ്റൺ ചലഞ്ചേഴ്സിനെയും പരാജയപ്പെടുത്തിയാണ് കലിഫോർണിയ ടീം വിജയം നേടിയത്. ഇന്ത്യൻ വോളീബോൾ ഇതിഹാസം ജിമ്മി ജോർജിന്റെ സ്മരണയ്ക്കായുള്ള ഈ ടൂർണമെന്റിലെ വിജയം ടീമിന് ഏറെ അഭിമാനകരമാണ്.
ഇതിനുപുറമെ ലൂക്കച്ചൻ മെമ്മോറിയൽ ചാമ്പ്യൻഷിപ്പുകൂടി നേടിയതോടെ ഒരേ സീസണിൽ രണ്ട് പ്രധാന കിരീടങ്ങൾ എന്ന നേട്ടം സി.ബി.വി.സി കൈവരിച്ചു. 2018-ൽ സ്ഥാപിതമായ ഈ ക്ലബ് ചുരുങ്ങിയ കാലയളവുകൊണ്ട് അമേരിക്കയിലെ മലയാളി വോളീബോൾ രംഗത്തെ പ്രമുഖ ടീമുകളിലൊന്നായി വളർന്നു കഴിഞ്ഞു. വിവിധ സംസ്ഥാനങ്ങളിലെ മികച്ച ടീമുകൾക്കൊപ്പം മത്സരിച്ച് നേടിയ ഈ വിജയങ്ങൾ കളിക്കാരുടെ കൂട്ടായ പരിശ്രമത്തിന്റെയും അർപ്പണബോധത്തിന്റെയും ഉദാഹരണമാണ്.
ഒരേ വർഷം രണ്ട് ദേശീയ കിരീടങ്ങൾ സ്വന്തമാക്കിയത് സി.ബി.വി.സി.യുടെ ചരിത്രത്തിലെ ഏറ്റവും തിളക്കമാർന്ന അധ്യായങ്ങളിലൊന്നായി മാറി. അമേരിക്കയിലെ മലയാളി വോളീബോളിന്റെ വളർച്ചയ്ക്കും വരുംതലമുറയിലെ താരങ്ങൾക്കും ഈ നേട്ടം വലിയൊരു പ്രചോദനമായിരിക്കുമെന്നതിൽ സംശയമില്ല.
