കാനഡയിലെ പ്രമുഖ എയർലൈൻ ആയ വെസ്റ്റ്‌ജെറ്റും ഫ്ലൈറ്റ് അറ്റൻഡൻ്റുമാരെ പ്രതിനിധീകരിക്കുന്ന യൂണിയനും തമ്മിലുള്ള പുതിയ കരാറിന് അഗീകാരം. വോട്ടെടുപ്പിൽ പങ്കെടുത്ത് 90.2 ശതമാനം ജീവനക്കാരും കരാറിനെ പിന്തുണച്ചതായി കനേഡിയൻ യൂണിയൻ ഓഫ് പബ്ലിക് എംപ്ലോയീസ് (CUPE) അറിയിച്ചു. ബോർഡിങ് സമയത്തെ വേതന തർക്കത്തെ തുടർന്ന് ഈ മാസം ആദ്യം ഏകദേശം 4,400 കാബിൻ ക്രൂ അംഗങ്ങൾ പണിമുടക്ക് ആരംഭിച്ചിരുന്നു. തുടർന്ന് കാൽഗറി ആസ്ഥാനമായ എയർലൈനും യൂണിയനും തമ്മിൽ നടന്ന ചർച്ചയിൽ ഇരുപക്ഷവും ധാരണയിലെത്തുകയായിരുന്നു.

പുതിയ കരാർ പ്രകാരം വരുന്ന മൂന്ന് വർഷത്തിനിടെ 18 ശതമാനത്തിലധികം ശമ്പള വർധന ജീവനക്കാർക്ക് ലഭിക്കും. ഇതിന് പുറമെ ഗ്രൗണ്ട് ഡ്യൂട്ടികൾക്കും യാത്രക്കാരുടെ ബോർഡിങ് സമയത്തെ ജോലികൾക്കും പ്രത്യേക പ്രതിഫലം നൽകാനും തീരുമാനമായിട്ടുണ്ട്. ഈ വർഷം ഒക്ടോബറിൽ 13 ശതമാനവും, 2027 ജനുവരിയിൽ 2.75 ശതമാനവും, 2028-ന്‍റെ തുടക്കത്തിൽ 2.5 ശതമാനവും ശമ്പള വർധന നടപ്പിലാക്കും. 2026 ജനുവരി 1 മുതൽ 2028 ഡിസംബർ 31 വരെയാണ് കരാർ കാലാവധി.