കോട്ടയം ജില്ലയിലെ അതിരമ്പുഴയിൽ നാല് വയസ്സുള്ള കുട്ടിയ്ക്ക് ഷിഗെല്ല രോഗബാധ കണ്ടെത്തി. കടുത്ത പനി, വയറുവേദന, ഛർദി, വയറിളക്കം എന്നീ ലക്ഷണങ്ങൾ അനുഭവപ്പെട്ടതിനെ തുടർന്ന് ഓഗസ്റ്റ് 8-നാണ് കുട്ടിയെ നഗരത്തിലെ സ്വകാര്യ ആശുപത്രിയിൽ പ്രവേശിപ്പിച്ചത്. തുടർന്ന് നടത്തിയ വൈദ്യപരിശോധനയിലാണ് ഷിഗെല്ല ബാക്ടീരിയയുടെ സാന്നിധ്യം സ്ഥിരീകരിച്ചത്. നിലവിൽ ആശുപത്രിയിൽ ചികിത്സയിൽ കഴിയുന്ന കുട്ടിയുടെ ആരോഗ്യനില മെച്ചപ്പെട്ടു വരുന്നുണ്ട്.
ഓഗസ്റ്റ് 6-ന് ഈ കുടുംബം ഒരു ഹോട്ടലിൽ നിന്ന് വാങ്ങിയ ചിക്കൻ മന്തി കഴിച്ചിരുന്നതായി കണ്ടെത്തിയിട്ടുണ്ട്. മലിനമായ ഭക്ഷണത്തിലൂടെയും ജലത്തിലൂടെയുമാണ് ഈ രോഗം പ്രധാനമായും പകരുന്നത് എന്നതിനാൽ, ഈ ഭക്ഷണത്തിൽ നിന്നാണോ ബാക്ടീരിയ ഉള്ളിൽ ചെന്നതെന്ന് ആരോഗ്യവകുപ്പ് സംശയിക്കുന്നു.
