നോർത്ത് അമേരിക്കയിലെ ഏറ്റവും പ്രശസ്തമായ ഓണാഘോഷങ്ങളിലൊന്നായ ‘മഹാഓണം’ ഇത്തവണ കൂടുതൽ ആകർഷകങ്ങളായ പരിപാടികളോടെ അരങ്ങേറുന്നു. ലെവിറ്റേറ്റ് എന്റർടെയ്ൻമെന്റ് സംഘടിപ്പിക്കുന്ന ഈ വലിയ ആഘോഷത്തിന്റെ ഭാഗമായി ഇക്കുറി ‘മിസ് കേരളം കാനഡ’ സൗന്ദര്യമത്സരവും നടക്കും. സൗന്ദര്യവും സംസ്കാരവും ആത്മവിശ്വാസവും കൈമുതലാക്കിയ മലയാളി വനിതകളെ റാംപിലേക്ക് സ്വാഗതം ചെയ്യുന്നതായി മുഖ്യസംഘാടകൻ ജെരിൻ രാജ് അറിയിച്ചു. അപർണ്ണ ചന്ദ്രശേഖറുടെ നേതൃത്വത്തിലാണ് ഈ മത്സരം ക്രമീകരിച്ചിരിക്കുന്നത്. ഡൈന ക്രിസ്റ്റഫർ കൊറിയോഗ്രാഫി നിർവഹിക്കുന്ന ഈ മത്സരത്തിൽ പങ്കെടുക്കാൻ ആഗ്രഹിക്കുന്നവർ ഉടൻ രജിസ്റ്റർ ചെയ്യേണ്ടതാണ്. 20 ഡോളറാണ് രജിസ്ട്രേഷൻ ഫീസ്.
ഓഗസ്റ്റ് 15 ശനിയാഴ്ച ടൊറന്റോയിലെ പ്രശസ്തമായ യങ് ആൻഡ് ഡൻഡാസ് സ്ക്വയറിൽ (സംഗമം സ്ക്വയർ) വച്ചാണ് ഈ വർണ്ണാഭമായ ചടങ്ങ് സംഘടിപ്പിക്കുന്നത്. ടൊറന്റോ നഗരത്തിന്റെ ഔദ്യോഗിക സാംസ്കാരിക കലണ്ടറിൽ പോലും ഇടംനേടിയ ‘മഹാഓണ’ത്തിൽ ഇത്തവണ കാനഡയിലെ വിവിധ പ്രവിശ്യകളിൽ നിന്നും അമേരിക്കൻ അതിർത്തി പ്രദേശങ്ങളിൽ നിന്നുമായി മുപ്പതിനായിരത്തിലധികം ആളുകൾ പങ്കെടുക്കുമെന്നാണ് പ്രതീക്ഷിക്കുന്നത്. സിനിമ-സംഗീത-നൃത്ത മേഖലകളിലെ പ്രമുഖർ അണിനിരക്കുന്ന പരിപാടിയിലേക്ക് കുടുംബസമേതം എത്തുന്ന ഏവർക്കും പ്രവേശനം പൂർണ്ണമായും സൗജന്യമായിരിക്കും.
കൂടുതൽ വിവരങ്ങൾക്കും സ്പോൺസർഷിപ്പ് ആവശ്യങ്ങൾക്കുമായി +1 (647) 781-3743 എന്ന ഫോൺ നമ്പറിലോ, contact@levitateinc.ca എന്ന ഇമെയിൽ വിലാസത്തിലോ ബന്ധപ്പെടാവുന്നതാണ്.
