സ്പെയിനുമായുള്ള ‘ഷെഞ്ചൻ സ്വതന്ത്ര യാത്രാ’ (Schengen free-movement) കരാർ ഇറ്റലി ഒരു മാസത്തേക്ക് താൽക്കാലികമായി റദ്ദാക്കി. വിമാനം വഴിയും കപ്പൽ വഴിയും സ്പെയിനിൽ നിന്ന് ഇറ്റലിയിലെത്തുന്ന തിരഞ്ഞെടുത്ത യാത്രക്കാർക്ക് മേൽ പ്രത്യേക പരിശോധന ഏർപ്പെടുത്തിയിട്ടുണ്ട്. ആഫ്രിക്കയിലെ സ്പാനിഷ് പ്രദേശമായ സെഉത്തയിലേക്ക് (Ceuta) അയൽരാജ്യമായ മൊറോക്കോയിൽ നിന്ന് വൻതോതിൽ അഭയാർത്ഥികൾ എത്തിയതിനെ തുടർന്നാണ് ഈ നടപടി.

ഈ തീരുമാനം സ്പാനിഷ് പൗരന്മാരെയോ മറ്റ് യൂറോപ്യൻ യൂണിയൻ പൗരന്മാരെയോ ബാധിക്കില്ലെന്നും ഇരു രാജ്യങ്ങൾക്കുമിടയിലുള്ള സാധാരണ യാത്രകൾ തുടരുമെന്നും ഇറ്റാലിയൻ അധികൃതർ അറിയിച്ചു. എന്നാൽ, യൂറോപ്യൻ യൂണിയന് പുറത്തുള്ള രാജ്യങ്ങളിൽ നിന്നുള്ള യാത്രക്കാർ സ്പെയിനിൽ നിന്ന് ഇറ്റലിയിൽ എത്തുമ്പോൾ കൂടുതൽ യാത്രാരേഖ പരിശോധന നേരിടേണ്ടി വന്നേക്കാം.

സ്പെയിൻ, ഇറ്റലി എന്നിവയ്ക്ക് പുറത്തുള്ള മറ്റ് രാജ്യങ്ങളിലെ പൗരന്മാർക്ക് സ്പെയിൻ വഴി ഇറ്റലിയിലേക്ക് യാത്ര ചെയ്യുമ്പോൾ ഇറ്റാലിയൻ വിമാനത്താവളങ്ങളിലും തുറമുഖങ്ങളിലും അധിക പരിശോധനകൾ പ്രതീക്ഷിക്കാം.യാത്രയിലുടനീളം സാധുവായ പാസ്‌പോർട്ട്, ഷെഞ്ചൻ വിസ, താമസസൗകര്യ വിവരങ്ങൾ ഉൾപ്പെടെയുള്ള അനുബന്ധ യാത്രാരേഖകൾ എന്നിവ കൈയ്യിൽ കരുതേണ്ടത് അത്യന്താപേക്ഷിതമാണ്. പുതിയ നിർദ്ദേശങ്ങളുടെ പശ്ചാത്തലത്തിൽ വിമാനത്താവളങ്ങളിലും അതിർത്തികളിലും കൂടുതൽ രേഖാപരിശോധനകൾക്ക് സാധ്യതയുള്ളതിനാൽ വിമാനത്താവള നടപടികൾക്കായി മുൻപത്തേക്കാൾ കൂടുതൽ സമയം കരുതുന്നത് യാത്ര സുഗമമാക്കാൻ സഹായിക്കും.

കൂടാതെ, യാത്ര തിരിക്കുന്നതിന് തൊട്ടുമുൻപ് അതത് വിമാനക്കമ്പനികളിൽ നിന്ന് നിലവിലുള്ള യാത്രാ നിർദ്ദേശങ്ങളും അപ്‌ഡേറ്റുകളും നേരിട്ട് ചോദിച്ചറിഞ്ഞ് ബോധ്യപ്പെടുക. അതോടൊപ്പം ഇമിഗ്രേഷൻ വിഭാഗത്തിന്റെയും ബന്ധപ്പെട്ട സർക്കാരുകളുടെയും ഔദ്യോഗിക അറിയിപ്പുകളും നിർദ്ദേശങ്ങളും കൃത്യമായി നിരീക്ഷിക്കുകയും പിന്തുടരുകയും ചെയ്യേണ്ടതാണ്. ഈ താൽക്കാലിക നടപടി ഷെഞ്ചൻ വിസ റദ്ദാക്കി എന്നർത്ഥമാക്കുന്നില്ല. സാധുവായ ഷെഞ്ചൻ വിസയുള്ള യാത്രക്കാർക്ക് ബോർഡർ പരിശോധനകൾക്ക് വിധേയമായി ഇറ്റലിയിലേക്കും സ്പെയിനിലേക്കും യാത്ര തുടരാവുന്നതാണ്.

എന്തുകൊണ്ടാണ് ഇറ്റലി ഇങ്ങനെയൊരു തീരുമാനമെടുത്തത്?

മൊറോക്കോയിൽ നിന്ന് സെഉത്തയിലേക്ക് പെട്ടെന്ന് അഭയാർത്ഥികളുടെ ഒഴുക്ക് വർദ്ധിച്ചതാണ് ഈ തീരുമാനത്തിന് കാരണം. ആയിരക്കണക്കിന് ആളുകൾ ഈ സ്പാനിഷ് പ്രദേശത്തേക്ക് കടക്കാൻ ശ്രമിച്ചതിനെ തുടർന്ന് അതിർത്തി നിയന്ത്രിക്കാൻ സ്പെയിൻ കൂടുതൽ സുരക്ഷാ സേനയെ വിന്യസിച്ചിരുന്നു. പൗരന്മാരുടെ സുരക്ഷ ഉറപ്പാക്കാനും യൂറോപ്യൻ അതിർത്തികൾ സംരക്ഷിക്കാനുമാണ് ഷെഞ്ചൻ കരാർ താൽക്കാലികമായി നിർത്തിവെച്ചതെന്ന് ഇറ്റാലിയൻ ഉപപ്രധാനമന്ത്രി അന്റോണിയോ താജാനി പറഞ്ഞു. “സ്പെയിനുമായുള്ള ഷെഞ്ചൻ കരാർ താൽക്കാലികമായി റദ്ദാക്കിയത് പൗരന്മാരുടെ സുരക്ഷ ഉറപ്പാക്കാനും യൂറോപ്യൻ അതിർത്തികളെ സംരക്ഷിക്കാനും ആവശ്യമായ ഒരു തീരുമാനമാണ്,” അദ്ദേഹം വ്യക്തമാക്കി.

ഷെഞ്ചൻ സുരക്ഷിതമാണെന്ന് സ്പെയിൻ

ഷെഞ്ചൻ സംവിധാനം അപകടത്തിലാണെന്ന ആശങ്കകളെ സ്പെയിൻ തള്ളി. കരാർ പൂർണ്ണമായും നിലവിലുണ്ടെന്ന് സ്പെയിൻ അറിയിച്ചു. സെഉത്തയിലേക്ക് കടന്ന ഭൂരിഭാഗം അഭയാർത്ഥികളും മൊറോക്കോയിലേക്ക് തന്നെ മടങ്ങിപ്പോയിട്ടുണ്ടെന്നും സെഉത്ത, മെലീല (Melilla) എന്നിവിടങ്ങളിൽ നിന്ന് സ്പെയിനിന്റെ മറ്റ് ഭാഗങ്ങളിലേക്കുള്ള യാത്രകൾ നിലവിൽ തന്നെ പോലീസിന്റെ പരിശോധനയിലാണെന്നും സ്പാനിഷ് വിദേശകാര്യ മന്ത്രി ഹൊസെ മാനുവൽ അൽബാരെസ് പറഞ്ഞു. “ഷെഞ്ചൻ മേഖലയുടെ സുരക്ഷിതത്വം പൂർണ്ണമായും ഉറപ്പുനൽകുന്നു,” അദ്ദേഹം കൂട്ടിച്ചേർത്തു.

അതിർത്തി പരിശോധന ശ ശക്തമാക്കി ഫ്രാൻസും

സെഉത്തയിലെ അഭയാർത്ഥി പ്രതിസന്ധിയെ തുടർന്ന് ഫ്രാൻസും സ്പെയിനുമായുള്ള അതിർത്തിയിൽ പരിശോധനകൾ കർശനമാക്കിയിട്ടുണ്ട്. സാഹചര്യങ്ങൾ നേരിടാൻ ഫ്രാൻസ് സ്പെയിനെ പിന്തുണയ്ക്കുമെന്ന് ഫ്രഞ്ച് പ്രസിഡന്റ് ഇമ്മാനുവൽ മാക്രോൺ വ്യക്തമാക്കുകയും അതിർത്തിയിൽ കൂടുതൽ പൊലീസിനെയും ഉദ്യോഗസ്ഥരെയും വിന്യസിക്കുകയും ചെയ്തു.

ഷെഞ്ചൻ യാത്ര: സ്പെയിൻ, ഇറ്റലി എന്നിവയ്ക്ക് പുറത്തുള്ള മറ്റ് രാജ്യങ്ങളിലെ പൗരന്മാർ അറിഞ്ഞിരിക്കേണ്ടത്

29 യൂറോപ്യൻ രാജ്യങ്ങളിലൂടെ പാസ്‌പോർട്ട് ഇല്ലാതെ യാത്ര ചെയ്യാൻ ഷെഞ്ചൻ മേഖല അനുവദിക്കുന്നുണ്ട്. എങ്കിലും സുരക്ഷാ കാരണങ്ങളാലോ ക്രമസമാധാന പ്രശ്നങ്ങൾ മൂലമോ അംഗരാജ്യങ്ങൾക്ക് താൽക്കാലികമായി അതിർത്തി പരിശോധനകൾ പുനഃസ്ഥാപിക്കാൻ സാധിക്കും. യൂറോപ്യൻ യാത്രകൾ പ്ലാൻ ചെയ്യുന്ന യു.എ.ഇ നിവാസികൾ, പ്രത്യേകിച്ച് ഷെഞ്ചൻ രാജ്യങ്ങൾക്കിടയിൽ യാത്ര ചെയ്യുമ്പോൾ, പുറപ്പെടുന്നതിന് മുൻപ് ഏറ്റവും പുതിയ അതിർത്തി നിയമങ്ങൾ പരിശോധിക്കാൻ നിർദ്ദേശിക്കുന്നു.