വിമാനത്താവളത്തിലെ പ്രവർത്തനത്തെക്കുറിച്ച് AI ബോട്ടുകള് വ്യാജ വാര്ത്തകള് പ്രചരിപ്പിക്കുന്നതായി മുന്നറിയിപ്പ് നൽകി കാനഡയിലെ ഏറ്റവും വലിയ വിമാനത്താവളമായ ടൊറൻ്റോ പിയേഴ്സൺ ഇന്റർനാഷണൽ എയർപോർട്ട് അധികൃതർ. യാത്രകൾ, വിമാനങ്ങളുടെ സമയം, റദ്ദാക്കലുകൾ എന്നിവയെ സംബന്ധിച്ച് എഐ ബോട്ടുകൾ ഉപയോഗിച്ച് തയ്യാറാക്കുന്ന ഇത്തരം വാർത്തകൾ യാത്രക്കാരെ തെറ്റിദ്ധരിപ്പിക്കുന്നുണ്ടെന്ന് അധികൃതർ വ്യക്തമാക്കി. ക്ലിക്ക് ബൈറ്റ് ലക്ഷ്യമിട്ട് പ്രവർത്തിക്കുന്ന വെബ്സൈറ്റുകൾ യാതൊരുവിധ പരിശോധനയുമില്ലാതെ ഒരു ദിവസം നൂറിലധികം വാർത്തകൾ വരെ ഇത്തരത്തിൽ പ്രസിദ്ധീകരിക്കുന്നുണ്ട്. സിസ്റ്റം തകരാറിലായെന്ന തരത്തിൽ തെറ്റായ വിവരങ്ങൾ പ്രചരിപ്പിക്കുന്നത് വലിയ ആശങ്കയുണ്ടാക്കുന്നുണ്ടെന്നും എയർപോർട്ട് വക്താവ് കൂട്ടിച്ചേർത്തു.
വിമാനങ്ങളുടെ സമയക്രമം, റദ്ദാക്കലുകൾ എന്നിവ സംബന്ധിച്ച കൃത്യമായ വിവരങ്ങൾ അറിയുന്നതിനായി യാത്രക്കാർ അതത് എയർലൈനുകളെ തന്നെ ആശ്രയിക്കണം. കൂടാതെ ടൊറൻ്റോ പിയേഴ്സൺ എയർപോർട്ടിന്റെ ഔദ്യോഗിക വെബ്സൈറ്റായ TorontoPearson.com സന്ദർശിച്ച് തത്സമയ വിവരങ്ങൾ പരിശോധിക്കാനും യാത്രക്കാർക്ക് സൗകര്യമൊരുക്കിയിട്ടുണ്ട്. വ്യാജ വാർത്തകൾക്കെതിരെ ജാഗ്രത പാലിക്കണമെന്നും ഔദ്യോഗിക ഉറവിടങ്ങളിൽ നിന്ന് മാത്രം വിവരങ്ങൾ ശേഖരിക്കണമെന്നും അധികൃതർ അഭ്യർത്ഥിച്ചു.
