അമേരിക്കൻ ഐക്യനാടുകളുടെ 250-ാം ജന്മദിനം അടയാളപ്പെടുത്തുന്ന 2026-ലെ സ്വാതന്ത്ര്യദിനം (ഫോർത്ത് ഓഫ് ജൂലൈ) ഒരു ശനിയാഴ്ചയാണ് വരുന്നത്. 1776-ൽ സെക്കൻഡ് കോൺടിനെന്റൽ കോൺഗ്രസ് സ്വാതന്ത്ര്യ പ്രഖ്യാപനം അംഗീകരിച്ച ദിവസത്തിന്റെ ഓർമ്മപ്പെടുത്തലാണ് ഈ വാർഷിക അവധി. രാജ്യത്തിന്റെ ഈ വലിയ സുദിനം ആഘോഷിക്കാൻ ട്രംപ് ഭരണകൂടം വലിയ പദ്ധതികളാണ് ആസൂത്രണം ചെയ്തിരിക്കുന്നത്. അതോടൊപ്പം കരിമരുന്ന് പ്രയോഗങ്ങളും പരേഡുകളും മറ്റ് ആഘോഷങ്ങളുമായി ഈ ദിനത്തെ വരവേൽക്കാൻ ജനങ്ങളും ആവേശത്തിലാണ്. ഇതൊരു ദേശീയ അവധി ദിനമായതിനാൽ സർക്കാർ ഓഫീസുകളെല്ലാം അടഞ്ഞുകിടക്കും. എന്നാൽ ഇത്തവണ അവധി ദിവസം ശനിയാഴ്ചയായതിനാൽ, അത് തൊട്ടടുത്തുള്ള ഒരു പ്രവൃത്തിദിനത്തിലാണ് ആചരിക്കുക. സാധാരണയായി ഒരു ഫെഡറൽ അവധി വാരാന്ത്യങ്ങളിലാണ് (ശനി, ഞായർ) വരുന്നതെങ്കിൽ, അതിന് തൊട്ടുമുമ്പുള്ള വെള്ളിയാഴ്ചയോ തൊട്ടുപിന്നാലെയുള്ള തിങ്കളാഴ്ചയോ ആണ് അവധിയായി കണക്കാക്കാറുള്ളത്. അതുപ്രകാരം ശനിയാഴ്ച വരുന്ന സ്വാതന്ത്ര്യദിനത്തിന്റെ ഭാഗമായി ഈ വർഷം ജൂലൈ 3 വെള്ളിയാഴ്ച ഒരു ഫെഡറൽ അവധി ദിനമായി യു.എസ് ഗവൺമെന്റ് ഓഫീസ് ഓഫ് പേഴ്‌സണൽ മാനേജ്‌മെന്റ് പ്രഖ്യാപിച്ചിട്ടുണ്ട്. എന്നാൽ അന്നേ ദിവസം എന്തൊക്കെ തുറക്കുമെന്നും അടയ്ക്കുമെന്നും പരിശോധിക്കാം.
ഈ ഫെഡറൽ അവധി ദിവസത്തിലും തപാൽ സേവനങ്ങൾ ലഭ്യമായിരിക്കും. ജൂലൈ 3 വെള്ളിയാഴ്ച പോസ്റ്റ് ഓഫീസുകൾ തുറന്നുപ്രവർത്തിക്കുമെന്നും സാധാരണ നിലയിൽ മെയിൽ ഡെലിവറി ഉണ്ടായിരിക്കുമെന്നും യുണൈറ്റഡ് സ്റ്റേറ്റ്സ് പോസ്റ്റൽ സർവീസ് (USPS) വ്യക്തമാക്കിയിട്ടുണ്ട്. എന്നാൽ ശനിയാഴ്ച അവധി വരുന്നതിനാൽ, ചില തപാൽ ജീവനക്കാർക്ക് ശമ്പളത്തിനും അവധിക്കും വേണ്ടി ഈ വെള്ളിയാഴ്ച അവധി ദിനമായി പരിഗണിക്കും. ബാങ്കുകളുടെ കാര്യമെടുത്താൽ ഫെഡറൽ റിസർവ് നിയമപ്രകാരം ശനിയാഴ്ചകളിൽ അവധി വരുമ്പോൾ തൊട്ടുമുമ്പുള്ള വെള്ളിയാഴ്ച ബാങ്കുകൾ തുറന്നുപ്രവർത്തിക്കണം. ചേസ്, ബാങ്ക് ഓഫ് അമേരിക്ക, എം ആൻഡ് ടി, സാന്റാൻഡർ തുടങ്ങിയ പ്രമുഖ ബാങ്കുകളെല്ലാം വെള്ളിയാഴ്ച പ്രവർത്തിക്കുമെങ്കിലും, സ്വാതന്ത്ര്യദിനത്തിന് മുന്നോടിയായി ചില ശാഖകളുടെ പ്രവർത്തന സമയത്തിൽ മാറ്റം വരുത്താനോ നേരത്തെ അടയ്ക്കാനോ സാധ്യതയുണ്ട്. അതിനാൽ പ്രാദേശിക ബാങ്ക് സമയങ്ങൾ മുൻകൂട്ടി സ്ഥിരീകരിക്കുന്നതാണ് നല്ലത്. അതേസമയം ജൂലൈ 4 ശനിയാഴ്ച ബാങ്കുകളും മറ്റ് ധനകാര്യ സ്ഥാപനങ്ങളും പൂർണ്ണമായി അടഞ്ഞുകിടക്കുകയും ജൂലൈ 6 തിങ്കളാഴ്ച മാത്രമേ വീണ്ടും തുറക്കുകയും ചെയ്യുകയുള്ളൂ.
ബാങ്കുകൾ തുറക്കുമെങ്കിലും ഓഹരി വിപണി വെള്ളിയാഴ്ച പ്രവർത്തിക്കില്ല. ന്യൂയോർക്ക് സ്റ്റോക്ക് എക്സ്ചേഞ്ചിന്റെയും (NYSE) നാസ്ഡാക്കിന്റെയും (Nasdaq) അവധി ഷെഡ്യൂൾ പ്രകാരം വെള്ളിയാഴ്ച എല്ലാ മാർക്കറ്റുകൾക്കും അവധിയായിരിക്കും. തുടർന്ന് ജൂലൈ 6 തിങ്കളാഴ്ച രാവിലെ 9:30-ന് മാത്രമേ വ്യാപാരം പുനരാരംഭിക്കുകയുള്ളൂ. ഡി.എം.വി (DMV) ഓഫീസുകളുടെ പ്രവർത്തനത്തിൽ സംസ്ഥാനങ്ങൾക്കനുസരിച്ച് മാറ്റമുണ്ടാകും. ഇല്ലിനോയിസ് ഉൾപ്പെടെ ന്യൂജേഴ്‌സി, ഫ്ലോറിഡ, വിർജീനിയ തുടങ്ങിയ പല സംസ്ഥാനങ്ങളിലെയും ഡി.എം.വി ഓഫീസുകളും മറ്റ് സർക്കാർ ഓഫീസുകളും ജൂലൈ 3-ന് അടഞ്ഞുകിടക്കും. എന്നാൽ കാലിഫോർണിയ ഡി.എം.വി, മാസാചുസെറ്റ്സ് ആർ.എം.വി എന്നിവ സാധാരണ പോലെ പ്രവർത്തിക്കുമ്പോൾ കണക്റ്റിക്കട്ട് പോലുള്ള ചില സംസ്ഥാനങ്ങൾ വെള്ളിയാഴ്ച നേരത്തെ ഓഫീസ് അടയ്ക്കും. അതുകൊണ്ട് തന്നെ പോകുന്നതിന് മുൻപ് അതത് ഓഫീസുകളുടെ സമയം പരിശോധിക്കാൻ അധികൃതർ നിർദ്ദേശിക്കുന്നുണ്ട്.
പ്രമുഖ കൊറിയർ സർവീസായ ഫെഡ്എക്സ് (FedEx) വെള്ളിയാഴ്ച ചെറിയ മാറ്റങ്ങളോടെ പിക്ക് അപ്പും ഡെലിവറിയും നടത്തും. ചില സ്ഥലങ്ങളിൽ നേരത്തെയുള്ള പിക്ക് അപ്പുകളും ഡ്രോപ്പ് ബോക്സ് കളക്ഷനുകളും ഉണ്ടായിരിക്കും, എന്നാൽ ചില ഡ്രോപ്പ് ബോക്സുകൾ അടച്ചിടാനും സാധ്യതയുണ്ട്. ഫെഡ്എക്സ് റീട്ടെയിൽ കേന്ദ്രങ്ങൾ അന്ന് പരിമിതമായ സമയങ്ങളിൽ പ്രവർത്തിക്കുമെങ്കിലും ജൂലൈ 4 ശനിയാഴ്ച ഫെഡ്എക്സിന്റെ യാതൊരുവിധ പിക്ക് അപ്പും ഡെലിവറിയും ഉണ്ടായിരിക്കുന്നതല്ല. ഇവ കൂടാതെ ഇല്ലിനോയിസിലെ കോടതികളും ജൂലൈ 3 വെള്ളിയാഴ്ച അടഞ്ഞുകിടക്കും. വിവിധ നഗരങ്ങളും ഗ്രാമങ്ങളും ഈ ദിവസത്തെ ഔദ്യോഗിക അവധിയായി ആചരിക്കുന്നതിനാൽ നഗരസഭാ ഓഫീസുകളും മറ്റ് മുനിസിപ്പൽ സ്ഥാപനങ്ങളും വെള്ളിയാഴ്ച പ്രവർത്തിക്കുന്നതല്ല.
