പൈലറ്റ് ലൈസൻസില്ലാതെ നൂറുകണക്കിന് വിമാന സർവീസുകൾ നടത്തിയ മുൻ എയർലൈൻ ക്യാപ്റ്റൻ കാനഡയിൽ അറസ്റ്റിലായി. സാമ്പത്തിക തട്ടിപ്പ് അന്വേഷിക്കുന്നതിന്റെ ഭാഗമായി രൂപീകരിച്ച ‘പ്രോജക്ട് ഇക്കാരസ്’ അന്വേഷണത്തിനൊടുവിലാണ് അറസ്റ്റ്. ചൊവ്വാഴ്ച രാവിലെ 11 മണിക്ക് ഇത് സംബന്ധിച്ച് കൂടുതൽ വിവരങ്ങൾ പുറത്തുവിടുമെന്ന് പീൽ റീജിയണൽ പോലീസ് (പിആർപി) അറിയിച്ചു.
സംഭവം വിവാദമായ പശ്ചാത്തലത്തിൽ വിശദീകരണവുമായി എയർ കാനഡ രംഗത്തെത്തി. യാത്രക്കാരുടെ സുരക്ഷയിൽ യാതൊരുവിധ വിട്ടുവീഴ്ചയും ഉണ്ടായിട്ടില്ലെന്ന് കമ്പനി വ്യക്തമാക്കി. ഈ പൈലറ്റിന് വലിയ വിമാനങ്ങൾ പറത്താൻ ആവശ്യമായ എയർലൈൻ ട്രാൻസ്പോർട്ട് പൈലറ്റ് ലൈസൻസ് (ATPL) ഇല്ലായിരുന്നെങ്കിലും ഇയാൾക്ക് കമേഴ്സ്യൽ പൈലറ്റ് ലൈസൻസ് ഉണ്ടായിരുന്നുവെന്നും എയർ കാനഡ പറയുന്നു. സേവനകാലയളവിൽ ഇയാൾ ആവശ്യമായ എല്ലാവിധ പരിശീലനങ്ങളും വിജയകരമായി പൂർത്തിയാക്കിയിട്ടുണ്ടെന്നും എയർ കാനഡ പ്രസ്താവനയിൽ അറിയിച്ചു.
