വാഷിംഗ്ടൺ: അമേരിക്കൻ ഐക്യനാടുകൾ ഇന്ന് തങ്ങളുടെ അംഡ് ഫോഴ്സസ് ഡേ (സയൂധ സേനാ ദിനം) വിപുലമായ പരിപാടികളോടെ ആഘോഷിക്കുന്നു. എല്ലാ വർഷവും മേയ് മാസത്തിലെ മൂന്നാമത്തെ ശനിയാഴ്ചയാണ് ഈ ദിനം ആചരിക്കുന്നത്. യു.എസ്. സായുധ സേനയുടെ വിവിധ വിഭാഗങ്ങളിൽ നിലവിൽ രാജ്യത്തിനായി സേവനമനുഷ്ഠിക്കുന്ന സൈനികരെയും വിരമിച്ചവരെയും (വെറ്ററൻസ്) ആദരിക്കാനും, രാജ്യാതിർത്തികൾ കാക്കുന്നതിൽ അവർ കാണിക്കുന്ന പ്രതിബദ്ധതയെ അഭിനന്ദിക്കാനുമാണ് ഈ ദിവസം പ്രധാനമായും നീക്കിവെച്ചിരിക്കുന്നത്.
1949-ൽ അന്നത്തെ യു.എസ്. പ്രസിഡന്റായിരുന്ന ഹാരി എസ്. ട്രൂമാനാണ് ഈ പ്രത്യേക ദിനാചരണം സ്ഥാപിച്ചത്. പ്രതിരോധ വകുപ്പിന് കീഴിൽ സൈന്യത്തെ പൂർണ്ണമായി ഏകീകരിച്ചതിനെത്തുടർന്നാണ് ഇങ്ങനെയൊരു തീരുമാനം എടുത്തത്. അതുവരെ കരസേന (Army), നാവികസേന (Navy), വ്യോമസേന (Air Force) എന്നിവയ്ക്കായി വെവ്വേറെ നിലനിന്നിരുന്ന ദിനാചരണങ്ങൾക്ക് പകരമായി, എല്ലാ സൈനിക വിഭാഗങ്ങളെയും ഒരേ കുടക്കീഴിൽ അണിനിരത്തിക്കൊണ്ടുള്ള ഒരു വലിയ ആഘോഷമായി ഇത് മാറ്റുകയായിരുന്നു. നിലവിൽ ആർമി, നേവി, എയർഫോഴ്സ് എന്നിവയ്ക്ക് പുറമെ മറൈൻ കോർപ്സ്, കോസ്റ്റ് ഗാർഡ്, സ്പേസ് ഫോഴ്സ് എന്നീ ആറ് വിഭാഗങ്ങളെയും ഈ ദിവസം ഒരേപോലെ ആദരിക്കുന്നു.
ഈ ദിനത്തോടനുബന്ധിച്ച് അമേരിക്കയിലുടനീളം വൻതോതിലുള്ള സൈനിക പരേഡുകൾ, വ്യോമാഭ്യാസ പ്രകടനങ്ങൾ (Air Shows), പൊതുസമ്മേളനങ്ങൾ എന്നിവ സംഘടിപ്പിക്കാറുണ്ട്. രാജ്യത്തിനായി ജീവൻ വെടിഞ്ഞവരെ ഓർക്കുന്ന ‘മെമ്മോറിയൽ ഡേ’, വിരമിച്ചവർക്കായുള്ള ‘വെറ്ററൻസ് ഡേ’ എന്നിവയിൽ നിന്നും വ്യത്യസ്തമായി, നിലവിൽ സൈന്യത്തിൽ സജീവമായി ജോലി ചെയ്യുന്ന ഉദ്യോഗസ്ഥരെയും അവരുടെ കുടുംബങ്ങളെയും പൊതുസമൂഹത്തിന് മുന്നിൽ പ്രത്യേകം അഭിനന്ദിക്കുക എന്നതാണ് ഈ ദിവസത്തിന്റെ പ്രധാന ലക്ഷ്യം.
