ഓട്ടവ: ആഗോളതലത്തിൽ വിദ്യാഭ്യാസ സ്ഥാപനങ്ങൾ വ്യാപകമായി ഉപയോഗിക്കുന്ന ഓൺലൈൻ ലേണിംഗ് മാനേജ്‌മെന്റ് സിസ്റ്റമായ ‘ക്യാൻവാസ്’ (Canvas) വലിയ രീതിയിലുള്ള സൈബർ ആക്രമണത്തിന് ഇരയായി. കാനഡയിലെ പ്രമുഖ സർവകലാശാലകളായ ടൊറന്റോ, ബ്രിട്ടീഷ് കൊളംബിയ (UBC), ആൽബെർട്ട എന്നിവയുൾപ്പെടെയുള്ള സ്ഥാപനങ്ങളിലെ വിദ്യാർത്ഥികളുടെയും അധ്യാപകരുടെയും വ്യക്തിഗത വിവരങ്ങളാണ് ചോർന്നത്.
ക്യാൻവാസിന്റെ നിർമ്മാതാക്കളായ ഇൻസ്ട്രക്ചർ (Instructure) നൽകുന്ന വിവരമനുസരിച്ച്, സൈബർ ആക്രമണത്തിലൂടെ വിദ്യാർത്ഥികളുടെ പൂർണ്ണനാമം, ഇമെയിൽ വിലാസങ്ങൾ, സ്റ്റുഡന്റ് ഐഡന്റിറ്റി നമ്പറുകൾ, പ്ലാറ്റ്‌ഫോമിനുള്ളിലെ സ്വകാര്യ സന്ദേശങ്ങൾ എന്നിവയാണ് ചോർന്നത്. എന്നാൽ, വിദ്യാർത്ഥികളുടെ പാസ്‌വേഡുകളോ ബാങ്ക് വിവരങ്ങളോ നഷ്ടപ്പെട്ടതായി ഇതുവരെ സ്ഥിരീകരണമൊന്നുമില്ലെന്ന് അധികൃതർ വ്യക്തമാക്കി.
പ്രമുഖ ഹാക്കർ ഗ്രൂപ്പായ ഷൈനി ഹണ്ടേഴ്സ് (ShinyHunters) ആണ് ഈ ആക്രമണത്തിന്റെ ഉത്തരവാദിത്തം ഏറ്റെടുത്തിരിക്കുന്നത്. ലോകമെമ്പാടുമുള്ള ഏകദേശം 27.5 കോടി ആളുകളുടെ വിവരങ്ങൾ തങ്ങളുടെ കൈവശമുണ്ടെന്നാണ് ഇവരുടെ അവകാശവാദം. വൻതുക മോചനദ്രവ്യമായി (Ransom) നൽകിയില്ലെങ്കിൽ ഈ വിവരങ്ങൾ ഇന്റർനെറ്റിലൂടെ പരസ്യപ്പെടുത്തുമെന്നും ഹാക്കർമാർ ഭീഷണിപ്പെടുത്തിയിട്ടുണ്ട്.
സംഭവത്തെത്തുടർന്ന് പ്ലാറ്റ്‌ഫോം ഭാഗികമായി പുനഃസ്ഥാപിച്ചെങ്കിലും, സുരക്ഷ മുൻനിർത്തി സർവകലാശാലകൾ വിദ്യാർത്ഥികൾക്ക് കർശനമായ ജാഗ്രതാ നിർദ്ദേശങ്ങൾ നൽകിയിട്ടുണ്ട്. ഇതിന്റെ ഭാഗമായി ക്യാൻവാസ് അക്കൗണ്ടിന്റെ പാസ്‌വേഡ് ഉടൻ മാറ്റണമെന്നും, ലോഗിൻ ചെയ്യുമ്പോൾ ലഭിക്കുന്ന മൾട്ടി-ഫാക്ടർ ഓതന്റിക്കേഷൻ (MFA) കോഡുകൾ യാതൊരു കാരണവശാലും മറ്റുള്ളവരുമായി പങ്കുവെക്കരുതെന്നും അധികൃതർ അറിയിച്ചു. കൂടാതെ, വ്യക്തിഗത വിവരങ്ങൾ ലക്ഷ്യമിട്ടുള്ള ഫിഷിംഗ് ആക്രമണങ്ങൾക്ക് സാധ്യതയുള്ളതിനാൽ സംശയാസ്പദമായ ഇമെയിലുകളോ ലിങ്കുകളോ തുറക്കരുതെന്നും നിർദ്ദേശമുണ്ട്
പല വിദ്യാലയങ്ങളിലും പരീക്ഷാക്കാലമായതിനാൽ ഈ സൈബർ ആക്രമണം വിദ്യാഭ്യാസ പ്രവർത്തനങ്ങളെ സാരമായി ബാധിച്ചിട്ടുണ്ട്. ചോർന്ന വിവരങ്ങൾ ഉപയോഗിച്ച് വ്യാജ രേഖകൾ നിർമ്മിക്കാനും വായ്പകൾ എടുക്കുന്നത് ഉൾപ്പെടെയുള്ള സാമ്പത്തിക തട്ടിപ്പുകൾ നടത്താനും സാധ്യതയുണ്ടെന്ന് സൈബർ സുരക്ഷാ വിദഗ്ധർ മുന്നറിയിപ്പ് നൽകുന്നു. ഉന്നത വിദ്യാഭ്യാസ സ്ഥാപനങ്ങൾ മുതൽ സ്കൂളുകൾ വരെ ഈ സുരക്ഷാ വീഴ്ചയിൽ വലിയ ആശങ്കയിലാണ്.
