ഒട്ടാവ: കഠിനമായ അലർജി അനുഭവപ്പെടുന്നവർക്ക് ആശ്വാസമായി, സൂചിയില്ലാത്ത ആദ്യത്തെ നാസൽ സ്പ്രേ ചികിത്സയ്ക്ക് ഹെൽത്ത് കാനഡ അനുമതി നൽകി. ‘നെഫി’ എന്ന് പേരിട്ടിരിക്കുന്ന ഈ മരുന്ന്, ഭക്ഷണമോ പ്രാണികളുടെ കടിയോ മൂലമുണ്ടാകുന്ന അലർജി തടയാൻ ഉപയോഗിക്കുന്ന സൂചി ഉപയോഗിച്ചുള്ള ഇൻജക്ഷനുകൾക്ക് പകരമായി പ്രവർത്തിക്കും. അലർജി ചികിത്സാ രംഗത്തെ വലിയൊരു കുതിച്ചുചാട്ടമായാണ് ആരോഗ്യ വിദഗ്ധർ ഇതിനെ കാണുന്നത്.
കാനഡയിലെ ഏകദേശം 25 ലക്ഷത്തോളം ആളുകൾ കഠിനമായ അലർജി പ്രശ്നങ്ങൾ നേരിടുന്നവരാണ്. ഇവർ സാധാരണയായി കൂടെക്കരുതാറുള്ള ‘എപിനെഫ്രിൻ ഓട്ടോ-ഇൻജക്ടറുകൾ’ സൂചി പേടി കാരണവും മറ്റും കൃത്യസമയത്ത് ഉപയോഗിക്കാൻ പലരും മടിക്കാറുണ്ട്. എന്നാൽ പോക്കറ്റിൽ കൊണ്ടുനടക്കാവുന്ന ഈ ചെറിയ നാസൽ സ്പ്രേ, അടിയന്തര സാഹചര്യങ്ങളിൽ മൂക്കിലൂടെ സ്പ്രേ ചെയ്ത് ജീവൻ രക്ഷിക്കാൻ സഹായിക്കും. 30 മാസത്തോളം ആയുസ്സുള്ള ഈ മരുന്നിന് പ്രത്യേക താപനിലയിലുള്ള സ്റ്റോറേജ് സൗകര്യങ്ങളും ആവശ്യമില്ല.
ഈ വർഷം വേനൽക്കാലത്തോടെ കാനഡയിലുടനീളമുള്ള ഫാർമസികളിൽ ‘നെഫി’ ലഭ്യമാകുമെന്ന് ഇതിന്റെ നിർമ്മാതാക്കളായ എഎൽകെ അബെല്ലോ ഫാർമസ്യൂട്ടിക്കൽസ് അറിയിച്ചു. അടിയന്തര സാഹചര്യങ്ങളിൽ സ്വയം മരുന്ന് പ്രയോഗിക്കാൻ കുട്ടികൾക്കും മുതിർന്നവർക്കും ഒരുപോലെ ഉപകാരപ്പെടുന്നതാണ് ഈ സ്പ്രേ. സൂചി ഉപയോഗിച്ചുള്ള ചികിത്സയോടുള്ള ഭയം മാറ്റാനും കൂടുതൽ ആളുകൾ സുരക്ഷിതരായിരിക്കാനും ഈ പുതിയ കണ്ടുപിടുത്തം സഹായിക്കുമെന്ന് ആരോഗ്യ മന്ത്രാലയം വ്യക്തമാക്കി.
