പാർലമെൻ്റ് അംഗങ്ങൾക്ക് നൽകാൻ നിശ്ചയിച്ചിട്ടുള്ള ശമ്പള വർദ്ധനവ് താൻ സ്വീകരിക്കില്ലെന്ന് ന്യൂ ബ്രൺസ്വിക് എംപി മൈക്ക് ഡോസൺ പ്രഖ്യാപിച്ചു. കാനഡയിലെ മിറാമിച്ചി-ഗ്രാൻഡ് ലേക്ക് മണ്ഡലത്തെ പ്രതിനിധീകരിക്കുന്ന കൺസർവേറ്റീവ് പാർട്ടി അംഗമാണ് ഇദ്ദേഹം. വരാനിരിക്കുന്ന ഏപ്രിൽ മാസം മുതൽ എംപിമാരുടെ ശമ്പളത്തിൽ 4.2 ശതമാനം വർദ്ധനവ് വരുത്താനാണ് അധികൃതർ തീരുമാനിച്ചിരിക്കുന്നത്. ഈ വർദ്ധനവ് നടപ്പിലായാൽ ഓരോ എംപിക്കും പ്രതിവർഷം 8,000 ഡോളറിലധികം (ഏകദേശം 6.5 ലക്ഷം രൂപ) അധികമായി ലഭിക്കും.
എന്നാൽ, രാജ്യത്തെ നിലവിലെ സാഹചര്യം പരിഗണിക്കുമ്പോൾ ഈ ശമ്പള വർദ്ധനവ് ഒട്ടും ഉചിതമല്ലെന്ന് ഡോസൺ തുറന്നടിച്ചു. കാനഡയിലെ സാധാരണക്കാർ വർദ്ധിച്ചുവരുന്ന ജീവിതച്ചെലവ് കാരണം നട്ടംതിരിയുകയാണെന്ന് അദ്ദേഹം ഓർമ്മിപ്പിച്ചു. പതിറ്റാണ്ടുകളായി സാധാരണ തൊഴിലാളികൾക്ക് അർഹമായ ശമ്പള വർദ്ധനവ് ലഭിക്കാത്ത സാഹചര്യത്തിൽ, ജനപ്രതിനിധികൾ മാത്രം കൂടുതൽ പണം കൈപ്പറ്റുന്നത് നീതിയല്ലെന്നും അദ്ദേഹം വാദിച്ചു.
തൻ്റെ ശമ്പളം വർദ്ധിപ്പിക്കരുതെന്ന് ആവശ്യപ്പെട്ട് ഡോസൺ ഹൗസ് ഓഫ് കോമൺസ് ക്ലർക്കിന് ഔദ്യോഗികമായി കത്തെഴുതി. തൻ്റെ ശമ്പളം നിലവിലുള്ള തുകയിൽ തന്നെ നിലനിർത്തണമെന്ന് പെയ്റോൾ വിഭാഗത്തോട് ആവശ്യപ്പെട്ട അദ്ദേഹം, “മനസ്സാക്ഷിക്ക് നിരക്കാത്തതിനാൽ” ഈ പണം വാങ്ങാൻ തനിക്ക് കഴിയില്ലെന്നും വ്യക്തമാക്കി. ശമ്പള വർദ്ധന പരസ്യമായി നിരസിച്ച ഏക എംപിയാണ് നിലവിൽ മൈക്ക് ഡോസൺ. തന്റെ ഈ തീരുമാനം മറ്റ് അംഗങ്ങൾക്കും ഒരു പ്രചോദനമാകുമെന്ന് അദ്ദേഹം പ്രത്യാശ പ്രകടിപ്പിച്ചു. എംപിമാർ ഇപ്പോൾ തന്നെ ഉയർന്ന ശമ്പളം കൈപ്പറ്റുന്നുണ്ടെന്ന വിമർശനം നിലനിൽക്കെ, ഡോസണിൻ്റെ ഈ തീരുമാനം രാഷ്ട്രീയ വൃത്തങ്ങളിൽ വലിയ ചർച്ചയായിട്ടുണ്ട്.
