ആൽബർട്ടയിൽ ഡിസംബർ, ജനുവരി മാസങ്ങളിൽ വാഹനാപകടങ്ങളിൽ മരിക്കുന്നവരുടെ എണ്ണത്തിൽ വൻ വർദ്ധന രേഖപ്പെടുത്തിയ സാഹചര്യത്തിൽ ഡ്രൈവർമാർ അതീവ ജാഗ്രത പാലിക്കണമെന്ന് ആർ.സി.എം.പി മുന്നറിയിപ്പ് നൽകി. കഴിഞ്ഞ ഡിസംബറിൽ മാത്രം ആൽബർട്ടയിലുടനീളം 20 മാരകമായ വാഹനാപകടങ്ങളാണ് റിപ്പോർട്ട് ചെയ്തത്. കഴിഞ്ഞ പത്ത് വർഷത്തെ ശരാശരിയായ 16.7-നേക്കാൾ ഉയർന്ന നിരക്കാണിത്.
ഈ പ്രവണത പുതുവർഷത്തിലും തുടരുകയാണെന്നും ജനുവരിയിലെ ആദ്യ നാല് ദിവസത്തിനുള്ളിൽ നാല് മരണങ്ങൾ റിപ്പോർട്ട് ചെയ്തതായും പോലീസ് അറിയിച്ചു. കനത്ത മഞ്ഞുവീഴ്ചയും മോശം കാലാവസ്ഥയും റോഡുകളിലെ കാഴ്ചാപരിധി കുറയ്ക്കുന്നതാണ് അപകടങ്ങൾക്ക് പ്രധാന കാരണമായി പറയുന്നത്. കഴിഞ്ഞ ഞായറാഴ്ച രാത്രി പോണോക്ക കൗണ്ടിയിലുണ്ടായ വാഹനാപകടത്തിൽ 59 വയസ്സുകാരൻ കൊല്ലപ്പെട്ടതാണ് ഏറ്റവും ഒടുവിലത്തെ സംഭവം. ഹൈവേ 53-ൽ വാഹനങ്ങൾ കൂട്ടിയിടിച്ച് ഡ്രൈവർ സംഭവസ്ഥലത്തുവെച്ച് തന്നെ മരിച്ചു. രണ്ടാമത്തെ വാഹനത്തിലുണ്ടായിരുന്ന ഡ്രൈവറെ പരിക്കുകളോടെ ആശുപത്രിയിൽ പ്രവേശിപ്പിച്ചു.
സെൻട്രൽ ആൽബർട്ടയിൽ കഴിഞ്ഞ ആഴ്ചകളിൽ തുടർച്ചയായുണ്ടായ മഞ്ഞുവീഴ്ചയും ഫ്രീസിംഗ് റെയിനും റോഡുകളെ അപകടക്കെണികളാക്കി മാറ്റിയിരിക്കുകയാണ്. യാത്ര ചെയ്യുന്നവർ വേഗത കുറയ്ക്കണമെന്നും കാലാവസ്ഥാ വ്യതിയാനങ്ങൾക്കനുസരിച്ച് ജാഗ്രത പുലർത്തണമെന്നും അധികൃതർ നിർദ്ദേശിച്ചു.
