ഇസ്രയേല്–ഹമാസ് യുദ്ധത്തിന്റെ രണ്ടാം വാർഷിക ദിനത്തിൽ ടൊറൻ്റോയിലെ ഹൈസ്കൂളിൽ ‘ഓ കാനഡ’ ദേശീയഗാനം അറബിയിൽ പ്രക്ഷേപണം ചെയ്തതിൽ രൂക്ഷ വിമർശനവുമായി ഒന്റാരിയോ വിദ്യാഭ്യാസ മന്ത്രി പോൾ കലന്ദ്ര. ഇത് യാദൃശ്ചികമാണെന്ന് വിശ്വസിക്കുന്നില്ലെന്നും, ഇനി ഇത്തരം സംഭവം ആവർത്തിക്കരുതെന്നും അദ്ദേഹം താക്കീത് നൽകി. ടൊറൻ്റോയിലെ ഏൾ ഹെയ്ഗ് സെക്കൻഡറി സ്കൂളിലാണ് സംഭവം. കാനഡയുടെ ഔദ്യോഗിക ഭാഷകളായ ഇംഗ്ലീഷിലോ ഫ്രഞ്ചിലോ ദേശീയഗാനം ആലപിക്കുകയോ അവതരിപ്പിക്കുകയോ ചെയ്യണമെന്നാണ് നിയമം.
ജൂത ജനതയ്ക്കെതിരെ നടന്ന തീവ്രവാദ ആക്രമണത്തിൻ്റെ വാർഷിക ദിനത്തിന്റെ പ്രാധാന്യം ആരും തിരിച്ചറിഞ്ഞില്ലെന്ന് വിശ്വസിക്കാൻ പ്രയാസമുണ്ടെന്ന് കലന്ദ്ര പറഞ്ഞു. കൂടാതെ എല്ലാ വിദ്യാർത്ഥികൾക്കും സുരക്ഷിതമായ പഠനാന്തരീക്ഷം ഒരുക്കുന്നതിൽ സ്കൂൾ ബോർഡുകൾ ശ്രദ്ധ കേന്ദ്രീകരിക്കണമെന്നും അദ്ദേഹം ആവശ്യപ്പെട്ടു. വിദ്യാഭ്യാസ മന്ത്രാലയവും ടൊറൻ്റോ ഡിസ്ട്രിക്റ്റ് സ്കൂൾ ബോർഡും സംഭവത്തിൽ അന്വേഷണം ആരംഭിച്ചു.
