ആൽബെർട്ട: നോർത്ത്ഈസ്റ്റേൺ ആൽബെർട്ടയിൽ പോലീസ് ഉദ്യോഗസ്ഥനെ കത്തിവെച്ച് ആക്രമിച്ച ഒരാളെ പോലീസ് വെടിവെച്ച് കൊലപ്പെടുത്തി. എഡ്മന്റന് 200 കിലോമീറ്റർ അകലെയുള്ള ലേക്ക് ലാ ബിഷെയിലാണ് സംഭവം നടന്നത്. പ്രദേശത്തെ ഒരു വീട്ടിൽ പ്രശ്നം നടക്കുന്നതായി വിവരം ലഭിച്ചതിനെ തുടർന്ന് മൂന്ന് ഉദ്യോഗസ്ഥർ സ്ഥലത്തെത്തുകയായിരുന്നുവെന്ന് ലേക്ക് ലാ ബിഷെ ആർസിഎംപി അറിയിച്ചു. എന്നാൽ പരിശോധനയ്ക്കിടെ ഉദ്യോഗസ്ഥരും അക്രമിയും തമ്മിൽ ഏറ്റുമുട്ടി. ഇയാൾ ഉദ്യോഗസ്ഥരിൽ ഒരാളെ ആക്രമിച്ചു.
അതേസമയം, മറ്റൊരു ഉദ്യോഗസ്ഥൻ ഇയാൾക്ക് നേരെ വെടിയുതിർക്കുകയായിരുന്നു. അക്രമിയുടെ ജീവൻ രക്ഷിക്കാൻ ശ്രമിച്ചെങ്കിലും സംഭവസ്ഥലത്ത് വെച്ച് തന്നെ ഇയാൾ മരിച്ചതായി ആർസിഎംപി അറിയിച്ചു. ആക്രമിക്കപ്പെട്ട ഉദ്യോഗസ്ഥനെ ഉടൻ തന്നെ ആശുപത്രിയിൽ പ്രവേശിപ്പിക്കുകയും ആരോഗ്യനില തൃപ്തികരമായതിനാൽ ചികിത്സ നൽകി വിട്ടയക്കുകയും ചെയ്തുവെന്ന് പോലീസ് പറഞ്ഞു. സംഭവത്തിൽ ആൽബെർട്ട സീരിയസ് ഇൻസിഡന്റ് റെസ്പോൺസ് ടീം അന്വേഷണം ഏറ്റെടുത്തു.
