ദുബായ്: ഗോൾഡൻ വിസയിൽ മുൻ നിബന്ധനകളെല്ലാം മാറ്റിവെച്ച് പുതിയ പരിഷ്‌കാരങ്ങളുമായി യുഎഇ. ആജീവനാന്ത യുഎഇ ഗോൾഡൻ വിസ സ്വന്തമാക്കാൻ ഇനി ഇന്ത്യക്കാർക്ക് കൂടുതൽ എളുപ്പമാണ്. സ്വത്തിലോ ബിസിനസിലോ ഗണ്യമായ നിക്ഷേപം ആവശ്യമായിരുന്ന പഴയ ഗോൾഡൻ വിസ സംവിധാനത്തിൽ നിന്നും തികച്ചും വ്യത്യസ്തമാണ് പുതിയ രീതി. ഇതുവരെ ഇന്ത്യൻ അപേക്ഷകർക്ക് കുറഞ്ഞത് 2 ദശലക്ഷം ദിർഹം(ഏകദേശം 4.66 കോടി രൂപ) പ്രോപ്പർട്ടി നിക്ഷേപമോ ബിസിനസ് നിക്ഷേപമോ ഉണ്ടെങ്കിൽ മാത്രമായിരുന്നു ഗോൾഡൻ വിസ നൽകി വന്നിരുന്നത്. എന്നാൽ പുതിയ നയ പ്രകാരം, ഇന്ത്യക്കാർക്ക് ഇപ്പോൾ 1,00,000 ദിർഹം(ഏകദേശം 23.30 ലക്ഷം രൂപ) അടച്ചാൽ ആജീവനാന്ത യുഎഇ ഗോൾഡൻ വിസ നേടാൻ കഴിയും.

മൂന്ന് മാസത്തിനുള്ളിൽ 5,000 ത്തിലധികം ഇന്ത്യക്കാർ ഈ നോമിനേഷൻ അധിഷ്ഠിത വിസയ്ക്ക് അപേക്ഷിക്കുമെന്നാണ് പ്രതീക്ഷിക്കുന്നതെന്ന് അധികൃതർ പറയുന്നു. പരീക്ഷാണാടിസ്ഥാനത്തിൽ ഈ വിസാ രീതിക്കായി ആദ്യ ഘട്ടത്തിൽ തെരഞ്ഞെടുത്തിരിക്കുന്നത് ഇന്ത്യയെയും ബംഗ്ലാദേശിനെയുമാണ്. കൂടാതെ, ഇന്ത്യയിൽ നോമിനേഷൻ അധിഷ്ഠിത ഗോൾഡൻ വിസ പ്രക്രിയയുടെ മേൽനോട്ടം വഹിക്കാൻ റയാദ് ഗ്രൂപ്പിനെയാണ് യുഎഇ സർക്കാർ തെരഞ്ഞെടുത്തിട്ടുള്ളത്.