ഇസ്രയേല് – ഇറാന് സംഘര്ഷത്തില് നേരിട്ട് ഇടപെട്ടുകൊണ്ടുള്ള അമേരിക്കന് ആക്രമണത്തെ അപലപിച്ച് ഐക്യരാഷ്ട്ര സഭ സെക്രട്ടറി ജനറല് രംഗത്തെത്തി. ഇറാനെ ആക്രമിച്ച അമേരിക്കന് നടപടി അപകടകരമെന്നാണ് യുഎന് സെക്രട്ടറി ജനറല് അഭിപ്രായപ്പെട്ടത്. അങ്ങേയറ്റത്തെ ആശങ്കയുണ്ടാക്കുന്ന നടപടിയാണ് അമേരിക്കയുടെ ഭാഗത്ത് നിന്നും ഉണ്ടായിരിക്കുന്നത്. ഇത് ആണവ നിര്വ്യാപന കരാറുകളെ ബാധിക്കുമെന്നും അന്റോണിയോ ഗുട്ടറസ് മുന്നറിയിപ്പ് നല്കി.
അതേസമയം ഇറാനെതിരായ ആക്രമണത്തില് അമേരിക്കയും പങ്കുചേര്ന്നതോടെ പശ്ചിമേഷ്യയിലാകെ ആശങ്ക കനക്കുകയാണ്. ഇറാന്റെ മൂന്ന് ആണവോര്ജ കേന്ദ്രങ്ങളിലാണ് യു എസ് യുദ്ധവിമാനങ്ങള് ബോംബിട്ടത്. ഫോര്ദോ, നതാന്സ്, ഇസ്ഫഹാന് ന്യൂക്ലിയര് കേന്ദ്രങ്ങളിലായിരുന്നു അമേരിക്കയുടെ ആക്രമണം. ബി 2 ബോംബര് ഉപയോഗിച്ചതായി സ്ഥിരീകരണമുണ്ടായിട്ടുണ്ട്. ദൗത്യം വിജയകരമെന്നാണ് യു എസ് പ്രസിഡന്റ് ഡോണള്ഡ് ട്രംപ് പ്രതികരിച്ചത്. ഇറാന് സമാധാന ശ്രമങ്ങള് ഉടന് നടത്തിയില്ലെങ്കില് വീണ്ടും ആക്രമിക്കുമെന്ന ഭീഷണിയും ട്രംപ് നല്കിയിട്ടുണ്ട്. ഇനിയും ആക്രമിക്കപ്പെടാന് ഇറാനില് ഇടങ്ങളുണ്ടെന്നത് ഓര്ക്കണമെന്നും ട്രംപ് മുന്നറിയിപ്പില് പറയുന്നു.
