വാഷിങ്ടന്: സിറിയയ്ക്കെതിരായ ഉപരോധങ്ങളില് ഇളവു നല്കി യുഎസ്. കഴിഞ്ഞയാഴ്ച ഗള്ഫ് സന്ദര്ശനത്തിനിടെ സിറിയന് ഇടക്കാല പ്രസിഡന്റ് അഹ്മദ് അശ്ശറായുമായുള്ള കൂടിക്കാഴ്ചയില് ഉപരോധം പിന്വലിക്കുമെന്നു ട്രംപ് വാഗ്ദാനം ചെയ്തിരുന്നു.
2019 ല് ഏര്പ്പെടുത്തിയ കടുത്ത ഉപരോധങ്ങളാണ് ആറ് മാസത്തേക്കു പിന്വലിച്ചത്. സിറിയന് സെന്ട്രല് ബാങ്കിന് ഏര്പ്പെടുത്തിയ വിലക്കും ഇതോടെ നീങ്ങി. വ്യാപാരം നടത്താന് യുഎസ് സ്ഥാപനങ്ങള്ക്കും വ്യക്തികള്ക്കുമുണ്ടായിരുന്ന വിലക്കും നീങ്ങി.
മൂന്ന് ഘട്ടമായിട്ടാണ് ഉപരോധങ്ങള് പിന്വലിക്കുക. ആദ്യ രണ്ട് ഘട്ടങ്ങളില് ഇളവുകള് ഭാഗികമോ താല്ക്കാലികമോ ആയിരിക്കും. സിറിയയിലെ പലസ്തീന്, ഇറാന് അനുകൂല സംഘടനകളുടെ താവളങ്ങള് ഒഴിവാക്കണമെന്നാണ് ആദ്യഘട്ടത്തില് യുഎസിന്റെ ആവശ്യം. ഉപരോധം പൂര്ണമായി നീക്കാന് സിറിയ ഇസ്രയേലുമായി നയതന്ത്രബന്ധം പുനഃസ്ഥാപിക്കേണ്ടിവരും.
