റിയാദ്: വീസ ബൈ പ്രൊഫൈൽ എന്ന പദ്ധതി പ്രഖ്യാപിച്ച് സൗദി. ഈ പദ്ധതിയിലൂടെ വീസ ക്രെഡിറ്റ് കാർഡ് ഉടമകൾക്ക് സൗദിയിലേക്ക് അതിവേഗം സന്ദർശന വീസ ലഭിക്കും. പദ്ധതി അടുത്ത മാസം മുതൽ നടപ്പാക്കും. റിയാദിൽ നടക്കുന്ന പ്രഥമ ടൂറിസം ഫോറത്തിലാണ് പദ്ധതി പ്രഖ്യാപനം വന്നത്. ലോകത്തു തന്നെ ഇത്തരത്തിൽ ഒരു സംവിധാനം ഇതാദ്യമാണ്.
സൗദി അറേബ്യ സന്ദർശിക്കാൻ ആഗ്രഹിക്കുന്ന യോഗ്യരായ വീസ കാർഡ് ഉടമകളുടെ വീസ പ്രോസസിങ് നടപടികൾ വേഗത്തിലാകും. പാസ്പോർട്ട്, വീസ കാർഡ് വിവരങ്ങൾ മാത്രം ഉപയോഗിച്ച് സൗദിയിലേക്കുള്ള വീസ സ്വന്തമാക്കാം. സൗദിയിലേക്ക് കൂടുതൽ വിനോദ സഞ്ചാരികളെ ലക്ഷ്യമിട്ടാണ് പദ്ധതി.
സർക്കാർ ഏജൻസികൾ, വിമാനത്താവളങ്ങൾ, ക്രെഡിറ്റ് ബ്യൂറോകളും ബാങ്കുകളും പോലുള്ള സ്ഥാപനങ്ങൾ നടത്തുന്ന ഡിജിറ്റൽ സംവിധാനങ്ങൾ എന്നിവ തമ്മിലുള്ള ഏകീകരണത്തിലൂടെ വീസ ഇഷ്യൂ ചെയ്യൽ പ്രക്രിയ പൂർണമായും ഓട്ടോമേറ്റ് ചെയ്യാനാണ് വീസ ബൈ പ്രൊഫൈൽ സംരംഭം രൂപകൽപന ചെയ്തിരിക്കുന്നത്.
