കാല്‍ഗറി: ചൈനയുമായുള്ള വ്യാപാരയുദ്ധം അമേരിക്ക ശക്തമാക്കുന്നതിനിടെ കാല്‍ഗറിയിലെ പ്രാദേശിക വ്യാപാര സ്ഥാപനങ്ങള്‍ പ്രതിസന്ധിയിലായതായി വ്യാപാരികള്‍. ആഗോള മാന്ദ്യത്തിന്റെ പശ്ചാത്തലത്തില്‍, യുഎസ് പ്രസിഡന്റ് ഡോണള്‍ഡ് ട്രംപ് ബുധനാഴ്ച മിക്ക രാജ്യങ്ങള്‍ക്കുമുള്ള തീരുവ 90 ദിവസത്തേക്ക് മരവിപ്പിച്ചിരുന്നു. അതേസമയം ചൈനയില്‍ നിന്നുള്ള ഇറക്കുമതിക്ക് 125 ശതമാനം തീരുവ ട്രംപ് ചുമത്തിയിട്ടുണ്ട്.
‘ഞങ്ങള്‍ ശരിക്കും സമ്മര്‍ദ്ദത്തിലാണ്,’ കാല്‍ഗറി ആക്ഷന്‍ ഹോബിയുടെ സഹ ഉടമയായ ഡൊണെറ്റ് ഹിസ്ലിപ്പ് പറയുന്നു. ചൈനയിലെ അറുപതോളം നിര്‍മ്മാതാക്കളില്‍ നിന്നാണ് ഈ സ്റ്റോര്‍ ഉല്‍പ്പന്നങ്ങള്‍ ശേഖരിക്കുന്നത്, തുടര്‍ന്ന് അവ യുഎസിലേക്ക് കയറ്റി അയക്കുന്നു. ആക്ഷന്‍ ഹോബിയുടെ ഉല്‍പ്പന്നങ്ങള്‍ ഒരു ഡസനിലധികം വ്യത്യസ്ത രാജ്യങ്ങളിലെ നിര്‍മ്മാതാക്കളില്‍ നിന്നാണ് വരുന്നത്. 90 ദിവസത്തിനുശേഷം യുഎസ് താരിഫുകളുമായി മുന്നോട്ട് പോകുകയാണെങ്കില്‍ നിലവിലെ പ്രതിസന്ധി രൂക്ഷമാകുമെന്നും ഡൊണെറ്റ് ഹിസ്ലിപ്പ് കൂട്ടിച്ചേര്‍ത്തു.
അതേസമയം, വില കുറയ്ക്കാന്‍ തങ്ങളാല്‍ കഴിയുന്നതെല്ലാം ചെയ്യുന്നുണ്ടെന്ന് ആക്ഷന്‍ ഹോബിയുടെ മാനേജര്‍ കിയാര ഫോയ്‌സി വ്യക്തമാക്കി.
