അവധിക്കാല യാത്രകൾക്കായി മെക്സിക്കോയിലേക്ക് പോകുന്ന കനേഡിയൻ പൗരന്മാർക്ക് യാത്രാ മുന്നറിയിപ്പ് നൽകി കനേഡിയൻ സർക്കാർ. ഉയർന്ന തോതിൽ സംഘടിത കുറ്റകൃത്യങ്ങൾ മെക്സിക്കോയിൽ നടക്കുന്നതിനാൽ യാത്രയ്ക്ക് ഒരുങ്ങുന്നവർ ജാഗ്രത പാലിക്കണമെന്ന് സർക്കാർ ട്രാവൽ അപ്ഡേറ്റിൽ പറയുന്നു. മെക്സിക്കോയിലേക്കുള്ള അനിവാര്യമല്ലാത്ത യാത്രകൾ ഒഴിവാക്കാനും കനേഡിയൻ പൗരന്മാർക്ക് സർക്കാർ മുന്നറിയിപ്പ് നൽകുന്നു.
കവർച്ച, അക്രമം, തട്ടിപ്പ് തുടങ്ങി നിരവധി കുറ്റകൃത്യങ്ങളാണ് വിനോദ സഞ്ചാരികളെയും മറ്റ് വിദേശികളെയും ലക്ഷ്യമിട്ട് മെക്സിക്കോയിൽ നടക്കുന്നത്. യാത്രയ്ക്കിടെ സായുധ സംഘങ്ങൾ എത്തി ഭീഷണിപ്പെടുത്തി കവർച്ചയും അക്രമവും നടത്തുന്ന നിരവധി സംഭവങ്ങൾ റിപ്പോർട്ട് ചെയ്യപ്പെട്ടതായി അധികൃതർ പറയുന്നു. യാത്രാ മുന്നറിയിപ്പ് നൽകിയിരിക്കുന്ന പ്രദേശങ്ങൾ സംബന്ധിച്ച കൂടുതൽ വിവരങ്ങൾക്ക് സർക്കാരിന്റെ അഡൈ്വസറി സന്ദർശിക്കാം.
