മലപ്പുറം: നിലമ്പൂർ ഉപതിരഞ്ഞെടുപ്പിൽ തൃണമൂൽ കോൺഗ്രസ് സ്ഥാനാർഥിയായി മത്സരിക്കുന്ന പി.വി. അൻവർ അന്തരിച്ച കോൺഗ്രസ് നേതാവ് വി.വി. പ്രകാശിന്റെ വീട്ടിൽ സന്ദർശനം നടത്തി. മലപ്പുറം ഡിസിസി മുൻ പ്രസിഡന്റായിരുന്ന വി.വി. പ്രകാശ്, 2021 നിയമസഭാ തിരഞ്ഞെടുപ്പിൽ അൻവറിനെതിരെ മത്സരിച്ച യുഡിഎഫ് സ്ഥാനാർഥി ആയിരുന്നു. വോട്ടെണ്ണലിനു രണ്ടുദിവസം മുൻപായിരുന്നു പ്രകാശിന്റെ അപ്രതീക്ഷിത മരണം. വി.വി. പ്രകാശിന്റെ ഭാര്യ സ്മിതയോടും മക്കളോടും അൻവർ വോട്ട് അഭ്യർഥിച്ചു.
എന്നും കോൺഗ്രസിനൊപ്പം നിൽക്കുമെന്ന് സ്മിത പിന്നീട് പ്രതികരിച്ചു. ‘‘വി.വി. പ്രകാശ് മരിച്ചപ്പോൾ പുതപ്പിച്ചത് കോൺഗ്രസ് പതാകയാണ്. ആ പാർട്ടി തന്നെയായിരിക്കും ഞങ്ങളുടെ മരണംവരെയും. ഞങ്ങൾ എന്നും കോൺഗ്രസ് പാർട്ടിക്കൊപ്പമാണ്. അതിൽകൂടുതൽ ഒന്നും പറയാനില്ല.’’– സ്മിത പറഞ്ഞു.
